Jónína Dúadóttir

Fiskurinn...

...er nafn á fyrirlestri sem ég fór á fyrr í vetur. Þetta var ekki fiskvinnslunámskeið, þó nafnið gæti vissulega bent til þess, það var eiginlega verið að kenna fólki að hafa gaman í vinnunni. Nokkrum körlum sem vinna á fiskmarkaði einhversstaðar í Bandaríkjunum, datt í hug að það þyrfti ekkert að vera leiðinlegt að vinna á fiskmarkaði. Þannig að þeir tóku sig til og fóru að gera að gamni sínu við kúnnana, henda fiskinum á milli sín, syngja, fara fram fyrir búðarborðið og leika við börnin og svona má lengi telja. Bara hafa gaman. Kúnnarnir langflestir virtust kunna vel að meta þetta og einhver gerði myndband um þessa gaura. Þetta er einn af fáum fyrirlestrum sem ég hef sótt, þar sem ég hef ekkert sofnað, mig minnir að ég hafi ekki einu sinni geispað. Þar sem ég sat og hlustaði og horfði, sá ég að þetta er það sama og ég er að gera í minni vinnu, láta sem mest eins og kjáni. Þó með þeirri undantekningu, að ég kasta ekki skjólstæðingum mínum upp í loftið. Bæði er það að ég hef ekki líkamlega burði til þess og svo er það örugglega bannað og skjólstæðingunum, sem langflestir eru aldrað og/eða lasburða fólk fyndist það ábyggilega ekkert sniðugt. Það er alveg hægt að láta sér leiðast í öllum vinnum, en það er líka alveg hægt að hafa gaman og maður verður þá oftast að finna það upp sjálfur. Eigið góðan og skemmtilegan dag í vinnunni