Drykkjumenning ?

Hverjum datt í hug að setja saman í eitt orð drykkju og menningu ? Hvað þýðir drykkjumenning ? Er það þegar gamli maðurinn, sem ég kíki til í kvöldvinnunni minni, drekkur "bara" eina vodkaflösku á viku, en gleymir alveg að geta þess, að hann skellir líka í sig nokkuð mörgum öðrum flöskum af hinum og þessum tegundum áfengis, með þessari einu og aðeins einu vodkaflösku á viku. Og svo frussar hann í ölæðinu, framan í dauðleiðan bæjarstarfsmanninn, að hann sé einn af fáum Íslendingum sem "kunna að drekka". En ég sé bara fyrir framan mig, gamla fyllibyttu sem notar alveg sömu aðferðina við að drekka sig fullan eins og aðrir, sem það leggja fyrir sig. Þarna er heilmikil drykkja, en ekki kem ég auga á neina menningu samt. Eða er það drykkjumenning að drekka allt sem hefur áfengi innanborðs, alveg sama hvernig það er á bragðið, hálfmeðvitundarlaus  af öllu þambinu og sjá hvorki veginn né daginn. Velta svo á öllum endum inn í rúm og líða illa allan næsta dag og jafnvel daginn þar á eftir líka. Þarna er líka mikil drykkja, en hvar er menningin ? Eða er það drykkjumenning að vera mikið í kokteilboðum og alls konar mannfögnuðum og sötra tískuvín úr flottum glösum ? Þarna er líka heilmikil drykkja en í hverju liggur menningin ? Litnum á blöndunni eða því hvernig glösin eru í laginu ? Eins og það skipti einhverju máli úr hvernig glösum og í hvaða umhverfi áfengið er innbyrt og hvort það er sötrað á löngum tíma eða þambað eins og hver gúlsopi sé sá síðasti. Áfengisdrykkja er ávísun á fyllerí og ég er ekki ennþá að koma auga á menninguna í þessu. En kannski drekk ég bara ekki nógu oft og ekki nógu mikið og hratt á sem lengstum tíma og ekki úr réttum glösum og fylgist heldur ekki nóg með brennivínstískunni og hef þar af leiðandi ekki hundsvit á þessu. Eigið góðan hvítasunnudag og njótið hans eins og ég og margir fleiri, bæði edrú og ótimbruð

Athugasemdir

[Erna Evudóttir, 27.5.2007 kl. 16:39]

Held nú kannski að alltof margir Íslendingar "kunni" að drekka, ekki svo flókið að opna flösku og láta hana rata á munninn á sér en það er að vísu soldið síðan ég stundaði þetta, man kannski ekki hvernig þetta var

[Jóhanna Pálmadóttir, 27.5.2007 kl. 18:23]

Vinur minn sagði einu sinni: "Ég á ekkert við áfengisvandamál að stríða, mér líður ekkert illa þegar ég er fullur, bara þegar ég er það ekki!"
Hann "kunni" sko heldur betur að drekka...verra með að hætta því!