Það eru hestar á lóðinni minni !

Að vísu með mínu samþykki og mér og öllum til mikillar ánægju. Fyrir utan það, þá  eru þeir líka afskaplega nytsamlegir fyrir mig prívat og persónulega. Nei, ég fer aldrei í reiðtúra, þeir koma í staðinn fyrir sláttuorfið, sem ég annars mundi þurfa að berjast um með þarna. Þeir eru innan rafmagnsgirðingar, sem er svo færð til eftir því hversu duglegir þeir eru að éta matinn sinn, kúka í hann og ganga hann niður í leiðinni. Þeir eru samt ekki á lóðinni við húsið, það væri ekki eins ánægjulegt, en við erum svo heppin að eiga smáland hér í kring. Á árum áður var lagt fyrir vatni þarna suður á blettinn, þar sem þeir eru og það væri alveg hið besta mál, ef kraninn til að opna fyrir vatnið væri ekki kyrfilega staðsettur á bak við þvottavélina mína. Og ofan á henni stendur svo þurrkarinn. Ég er allt of andsk... löt til að færa þetta á hverjum degi og er ekki enn búin að sjá út hvernig hægt er að leysa þetta, en það kemur. Þangað til fá þeir bara vatn úr garðslöngunni minni, sem ég tengi á kranann í eldhúsinu. Ég vökva hvort eð er runna og blóm og gras, daglega og munar ekkert um að vökva eins og tvö stykki grasmótora í leiðinni. Ég ætla að fara út að vökva hesta. Eigið góðan dag