Jónína Dúadóttir

Fiskidagurinn mikli ! Þvílík snilld !

Við fórum með tjaldvagninn til Dalvíkur á föstudagskvöldið, komum heim í morgun. Tilefnið var að taka þátt í Fiskideginum mikla þar í bæ. Það var hreint brjálæðislega margt fólk þarna, með húsbíla og fellihýsi og tjaldvagna og hjólhýsi og tjöld af öllum stærðum og gerðum. Þegar tjaldstæðið var orðið fullt og allir grænir blettir í bænum, þá var húsbílum og vögnum lagt á bílastæðin við skólann og annars staðar og bændurnir lögðu túnin sín undir afganginn af gestunum. Það voru settir upp kamrar út um allan bæ og á túnunum og skemmtilegar skreytingar á húsunum og í öllum götunum og ljósastaurum og allir glaðir og brosandi og það voru greinilega allir íbúar Dalvíkur að halda þessa hátíð. Og þarna voru allir svo innilega velkomnir, alveg sama á hvaða aldri þeir voru. Auðvitað var mikið rusl, það er óhjákvæmilegt með allan þennan fjölda í einum litlum bæ, en það var týnt upp jafnóðum af heilum her af sjálfboðaliðum. Og eitthvað las ég um pústra og fyllirí, en fylgir það ekki alltaf öllu fólki, sérstaklega þar sem eru saman komnir tugir þúsunda á einu litlu svæði. Það er svo glæsilega að öllu staðið þarna að ég held að það sé ekki hægt að toppa það. Það voru líka frábær skemmtiatriði á sviðinu niðri við höfnina, stanslaust frá 11 til 5, sem gestirnir fengu að njóta meðan þeir borðuðu sig sadda af alls konar kræsingum. Og allt þetta er þetta gert í sjálfboðavinnu og allt er ókeypis, tjaldstæðin, allur maturinn og öll skemmtiatriðin. Þetta er ekki í fyrsta skiptið sem við förum á Fiskidaginn og alls ekki í síðasta skipti heldur. Ferfalt HÚRRA fyrir öllum Dalvíkingum og fyrir Fiskideginum þeirra ! Takk fyrir okkur ! Eigið góðan dag

Flokkur: Bloggar | 12.8.2007 | 13:34 | Facebook

Athugasemdir

Þú varst að segja Húrra fyrir Dalvíkingum þótti nú ekki góður siður hérna í eina tíð, en segðu engum frá því en mér finnst þetta alveg frábært framtak hjá þeim