Jónína Dúadóttir

Hún á afmæli hún Linda Björg :-)

Yngsta barnabarnið okkar, hún Linda Björg Keel Kristjánsdóttir, er tveggja ára í dag Til hamingju elsku dúllan Amma hennar og afi frá Sviss, oma og opa, eru í heimsókn þessa viku. Þau komu á síðasta föstudag og á laugardeginum fóru sonur minn og tengdadóttir með þau heiðurshjónin á Gljúfurárrétt hérna úti í Höfðahverfinu, eins og lög gera ráð fyrir á réttardaginn. Þá vildi nú ekki betur til en svo, að mamma tengdadóttur minnar fótbrotnaði á réttunum og er í gifsi, með fjölskylduhækjurnar sem fasta förunauta. Þá sannaðist hið fornkveðna, nei nei það passar ekkert mér finnst þetta bara svo flott, sannaðist það sem maðurinn á Bjargi sagði mér í vetur, þegar hann ráðlagði mér að kaupa hækjurnar í staðinn fyrir að leigja þær : "Það er alveg bráðnauðsynlegt fyrir hverja fjölskyldu að eiga minnst eitt par af hækjum"! Ég gerði óspart grín að þessari yfirlýsingu hans í pistli hér á blogginu, en ég biðst afsökunar á því og eyði líklega bara þeim pistliAnnars er ekki mikið annað að frétta héðan, nema að það snjóaði í fjöll hér í gær..... brrrr.... En það var nú bara uppi í fjöllunum, rigndi sleitulaust hérna niðurfrá. Mér finnst rigningin góð og líður vel á meðan það snjóar ekki á mig. Lítið að gera í kvöldvinnunni, rétt aðeins skrepp í 1 1/2 - 2 tíma á kvöldi, en ég hef hlerað að það eigi nú eftir að lagast bráðlega. Eigið góðan dag í allan dag

Flokkur: Bloggar | 13.9.2007 | 07:35 | Facebook

Athugasemdir

Til hamingju með skvísuna.En hvað gerði konan til að fótbrotna,mig minnti að þetta væri ekki svo hættulegur staður

Birna Dúadóttir, 13.9.2007 kl. 07:46

Takk Ég hef ekki spurt, en kannski gerðist þetta bara vegna þess að blessunin var algerlega ódrukkin. Hefði kannski betur sturtað í sig góðum slurk úr landapela í lopasokk, argað nokkra góða slagara með bændunum og verið svo skutlað heim á heyvagni með hnakkinn fyrir kodda.......