Brotið og bramlað....

Æi, hvaðan kemur allur þessi snjór eiginlega ? Er nú ekki kominn tími til að fara að skrúfa fyrir ? Að vísu hef ég ekkert verið að dunda mér með málband úti í sköflunum, hef átt nóg með að reyna að komast upp úr þeim, en ef smiðsaugað svíkur mig ekki, þá er kominn meira en metri af jafnföllnum snjó og það bara á 3-4 dögum. Og ég sem er að vinna kvöldvinnuna akkúrat þessa dagana og kemst alls ekki upp með að vera bara inni, eins og mig langar mest til að gera.... Það er að vísu fínasta líkamsrækt að klofa svona skaflana í 3-4 klukkutíma á hverju kvöldi, en á það verður að líta að ég var ekkert á leiðinni í líkamsrækt, en ef svo væri mundi ég gjarnan vilja sjálf fá að ákveða aðferðina. Og það yrðu sko alveg örugglega engar vetraríþróttir sem ég mundi stunda ! En nóg af væli, ég lofaði að næst þegar ég bloggaði yrði ég á kafi í steinryki og stend við það. Spúsi er búinn  að brjóta upp helminginn af rásinni í gólfið og afganginn klárar hann í dag. Áður en við  lögðum í það stórvirki að búa okkur sjálf til íbúð hérna niðri í Fjallakofanum, þá var ég nú á þeirri skoðun að skítur væri bara skítur, en þá var ég sko ekkert búin að kynnast steinryki...... En það er hiti á öllum ofnum, sem hefur komið sér sérlega vel undanfarna tvo daga í 10-12 stiga frosti   Gangið glöð inn í daginn og verið góð við sjálf ykkur og (flest)alla hina líka   

Athugasemdir

[Erna Evudóttir, 3.2.2008 kl. 09:04]

Hérna er ca 5 cm jafnfallinn snjór, allir voða jolly yfir því, þessi umræddi snjór kom í gær og fer sjálfsagt aftur í dag

[Júdas, 3.2.2008 kl. 09:13]

Góðan dag vinkona.  Í  Guðs bænum passaðu þig bara á ísbjörnunum sem mér skilst að séu þarna á norðurhjara.   Það yrði auðvitað líkamsrækt að hlaupa undan þeim en.........samt.   .

Ætli það sé hægt að fara í mál við ættingja Helga Magra og Þórunnar Hyrnu sem mér skilst að hafi ákveðið að þarna skyldi vera búandi.

[Jóna Á. Gísladóttir, 3.2.2008 kl. 11:46]

Nú hef ég greinilega ekki fylgst með.. hvar ertu kona svo þú þurftir að klofa skafla í margar klukkustundir á dag?

[Birna Dúadóttir, 3.2.2008 kl. 12:48]

Hún er á norðurhjara,undir fjallinu mikla,á mörkum hins byggilega heims.Býr fyrir ofan snjóflóðavarnir

[Birna Dúadóttir, 3.2.2008 kl. 12:54]

Skutlarðu ekki bollum í tengdadóttur hans Björns heitins

[Ólöf Jóhanna Pálsdóttir, 3.2.2008 kl. 13:19]

Það er nú meiri snjórinn hérna hjá okkur, mætti alveg stytta upp í bráð. En það er fallegt úti og kannski upplagt að taka nokkrar myndir til að hafa á jólakort. Ekki ráð nema í tíma sé tekið.

[Jónína Dúadóttir, 3.2.2008 kl. 15:17]

Akureyri snjórassg... nei snjóparadís norðursins ! Jú þetta er fallegt fyrir innan gluggana, en að vinna á kvöldin við að heimsækja fólk, sem hefur ekki burði til að moka frá húsunum sínum, það er vissulega líkamsrækt í lagi

[Gunnar Helgi Eysteinsson, 3.2.2008 kl. 15:43]

Ég öfunda þig... og ég er ekki að grínast. 

[Jónína Dúadóttir, 3.2.2008 kl. 16:28]

Gunnar minn ég hef samúð með þér í öllu snjóleysinu og öfunda þig, þetta er orðið ágætt 

Ég er solltið farin að hafa áhyggjur af ísbjörnunum