Gleðilegt sumar og takk fyrir veturinn :)

Það er sannarlega sumarlegt að líta út núna... hm... smá ýkjur, kannski bara vorlegt... sólin skín, það er komin græn slikja á lóðina og krókusarnir og páskaliljurnar sem við fengum í kaupbæti með húsinu  okkar standa í fullum blóma, gatan að þorna eftir rigninguna... ekki snjókomuna takið eftir... í gær og konan sem ber út blaðið er hætt að nota kuldagallann sinn Það vantar bara laufið á trén og sumarfríið mitt og þá er þetta fullkomið Alveg hreint afspyrnu góð inn í þennan fyrsta dag sumars, lífið leikur við mig eins og alltaf... auðvitað eru stundum smá hnökrar en þeir eru hverfandi litlir... ég er dekurbarn tilverunnar, hef það alltaf allt of gott og líður frábærlega með því ! Það var nú mestmegnis þetta sem ég vildi sagt hafa... jú og ég er búin að ákveða hvað ég ætla að kjósa Valið stóð á milli tveggja flokka og ég valdi þann sem hefur huggulegra nafnið að mínu mati... kannski málefnin hafi líka haft einhver áhrif, en það er bara svo erfitt að meta hver lýgur minnst og hverjum er treystandi til að svíkja sem fæst kosningaloforð Það er á áætlun að slugsa og hangsa sem mest í dag, þangað til ég fer í vinnuna um fimm leitið og svei mér ef ég stend ekki bara við það Eigið dásamlegan fyrsta sumardag og látið ykkur líða eins vel og hægt er... yfir og út

Jæja elskurnar....

Setti inn mynd af nýjustu lopapeysunni sem ég var að prjóna, eigandinn er búinn að fá hana í hendurnar... svo hún er ekkert leyndarmál lengur Það er að koma vor... ekki seinna vænnaÉg er búin með 6 kaffibolla síðan ég vaknaði, er á þeim sjöunda og er svo yndislega löt og andlaus að mér dettur ekkert í hug nema drekka kaffi  Búin með lopapeysuna, hún er tilbúin til afhendingar í dag... djö... dugnaður er þetta í konunni !Set inn montmynd þegar væntanlegur eigandi er búinn að fá hana í hendurnarKosningar á næsta leiti og ég er ekki búin að ákveða hvað ég ætla að kjósa... en ég veit samt alveg hvað ég ætla ekki að kjósa... alls ekki fullnægjandi árangur en þó skref í áttinaÉg var að hlusta á Ástþór Magnússon á Bylgjunni áðan og eftir því sem mér heyrist, virðist aðalframlag hans til kosningabaráttunnar vera mestmegnis kvartanir yfir því að hann fái ekki að tjá sig nógu mikið á ljósvakamiðlunum... Ef rétt er, af hverju ætli það sé þá ? Kannski af því að það eru afskaplega fáir sem taka blessaðan manninn alvarlega ?

Okkar háæruverðugi Lúkas heimilisköttur er að missa sig í vorinu...Hann er með lögheimili frammi í vaskahúsi og þar kemst hann alltaf inn og út eins og honum þóknast. En honum þóknast líka að vera hérna inni í og ef ég er ekki nógu fljót að hleypa honum inn þegar hann klórar á hurðina inn í eldhúsið, þá fer hann út og fram fyrir húsið og djöflast í póstlúgunni á útihurðinni, þangað til ég opna fyrir honum... hann kemur inn smástund og heimtar þá að fara út aftur...Sjáið fyrir ykkur kýrnar að vori þegar þeim er hleypt út í fyrsta skipti... margfaldið með fjórum og þá er komin raunsönn lýsing á atferli hans hátignar Lúkasar heimiliskattar...

Ferlega góð inn í þennan fína dag... eins og alltaf baraVinn kvöldvinnuna mína þessa viku og einhvernveginn hef ég lent í að vinna flesta hátíðisdaga það sem af er árinu. Vinn auðvitað á kjördaginn og sumardagurinn fyrsti kemur inn í núna og það verður meira að gera en venjulega, komin nýr skjólstæðingur sem á alla fimmtudaga og einn á líka alla rauða daga aukalega, fyrir utan allar helgar. En af því að mér finnst alltaf allt fallegt í sól þá er þetta bara hið besta mál samt og svo er auðvitað engin dagvinna þann daginnFyrir þá sem þó nenntu að lesa þennan gjörsamlega innihaldsrýra og algerlega gagnslausa pistil... takk fyrir innlitið... og eigið góðan dag

Strákurinn minn ;)

Linda Björg þriggja ára sonardóttir mín er öll í ættfræðinni núna... pabbi hennar er alltaf "strákurinn minn" þegar hún talar um hann við mig Við stöllur dettum stundum í djúpar umræður um rúmlega 30 ára gömul bleyjuskipti af mikilli innlifun... henni finnst afskaplega athyglisvert að einu sinni var pabbi sem núna er svooooo stór 1 og 80+ bara pínulitli strákurinn hennar ömmu, með bleyju og svo grét hann líka... alveg stórmerkilegt "Ég er að fara í búðina með strákurinn þinn amma" Nú, hvað eruð þið að fara að kaupa ? "Hm... veidekki, kannski bara eitthvað handa mér eða bara leika okkur í búðinni" Jamm og jæja... ég ætti kannski að ræða við "strákurinn minn" um barnauppeldi... Ó nei aldrei í lífinu, mér finnst þeim takast vel með uppeldið á þessari yndislegu litlu skvísu Og svo er ég líka alfarið á móti beturvitrungum, leiðinleg manngerð þar á ferð Þó ég sé búin að skila af mér þremur börnum, þá er ég sko barasta alls enginn sérfræðingur í barnauppeldi, maður gerir bara eins vel og maður kann og getur í það og það skiptið... en ég svara að sjálfsögðu ef ég er spurð og hef svo sem betur fer, vit á að þegja inn á milli Hér skín sólin eins og henni sé borgað fyrir það... almáttugur hvað ég er búin að sakna hennar !!! Nú er ég komin í vorstuð og vil helst fara að viðra tjaldvagninn, klippa runnana... ef ég ætti þá, drösla sláttuvélinni upp úr kjallaranum og planta blómum, ekki í beð samt bara dalla... ég er með andlegt ofnæmi fyrir blómabeðum En ég doka nú líklega eitthvað aðeins með allt þetta... Góða helgi elskurnar

Sólin löngu komin upp...

... og ekki nóg með það, hún skín hérna á norðurhjaranum Það var eitthvað grátt á framrúðunni á bílnum mínum í morgunsárið... ég gæti reynt að telja sjálfri mér trú um að það hafi verið ryk, en fyrst sólin verkaði það í burtu hlýtur það að hafa verið héla Nú erum við búin að búa eitt ár í þessu yndislega húsi sem er sextugt á árinu... byggt 1949 svo það kemur af sjálfu sér. Heldur sér mjög   vel miðað við aldur, að vísu hefur þurft að flikka aðeins upp á það, svona eins og gengur og gerist og ekki alveg búið enn. En aðaláherslan hjá okkur í sumar verður samt lóðin í kringum það... búa til almennilegt bílastæði... setti inn mynd af því alveg spes fyrir Birnu systir, við erum að metast um hvor okkar á ógeðslegra bílastæði... Plöntum runnum meðfram lóðinni út við gangstéttina til að loka svolítið út á götuna og smíðum stóran pall hér fyrir framan. Einhver sagði að pallurinn væri svo stór að það þyrfti byggingarleyfi fyrir honum... veit ekki hvort það er rétt, en ég ætla nú að athuga það svona rétt til öryggis Ferlega góð inn í þennan fína föstudag og bíð eftir helginni til að þrífa hérna... veit það er svolítið sikk, en oft var þörf en nú er nauðsyn. Hef lítið gert hérna undafarna daga nema að prjóna lopapeysu, sem ég ætla að setja inn mynd af þegar hún er búin og þegar væntanlegur eigandi er búinn að fá hana í hendurnar... hún er nefnilega leyndarmál Það er svo gaman að fara á bak við fólk... með eitthvað svona ánægjulegt það er að segja Eigið góðan dag og ennþá betri helgi, það ætla ég að gera

Kosningar...

... eftir 9 daga og ekki orð um það meir Hef meiri áhuga á því í augnablikinu hvenær frostið fer úr jörðinni... Það var nefnilega hringt í gær frá umhverfisdeild bæjarins og við beðin um að hætta að subba svona út götuna fyrir framan húsið okkar... götusóparabílarnir hafa sem sagt ekki undan að þrífa eftir mig... úps Bílastæðið okkar, ef bílastæði skyldi kalla... gras sem einhvertímann hefur verið slett smá möl yfir, er orðið einn stór drullupyttur og auðvitað berst fj... drullan út á götuna, þegar við bökkum út. Við lögðum samt þar vegna þess að þetta er mikil umferðargata og ég hef satt að segja áhyggjur af bílunum okkar þegar við leggjum þeim við gangstéttina... Um leið og hægt er verður grafið upp úr þessum drullupytti/bílastæði og sett möl í staðinn... alla leið niður á fast   Elsku bíllinn minn blái er núna úti á götu og mér er ekki sama... En samt ferlega góð inn í daginn eins og alltaf Afskaplega ánægð með að vera að fara að vinna næstsíðasta vinnudaginn í vikunni... það er eins og ég sé hætt að nenna þessu og þannig er það líka... Verð alltaf svona afspyrnu löt á þessum tíma árs... alveg að fá upp í kok af vinnunni... en svo þegar sumarfríið er að verða búið er ég komin með upp í kok af fríi... erfitt að gera manni til geðs Eigið góðan dag í vorinu elskurnar mínar  

Ekki vinnufriður...

... fyrir frídögum þessa og næstu 3 vikur hjá mér Í næstu viku er sumardagurinn fyrsti, ekki það að ég merki það á neinu nema dagatalinu... það er hvít jörð og snjóar enn og aftur... þar á eftir kemur svo 1. maí og vikuna þar á eftir klára ég vonandi loksins sumarfrí ´08 Ég er svo með það á hreinu að það sé mánudagur í dag, að ef ég hugsa ekki um hvað ég er að gera fer ég á kolranga staði í vinnunni Note: Verulega vænlegt til árangurs að hugsa áður en maður framkvæmir Það er nú samt rangur misskilningur að mér finnist vont að vera í fríum... það er öllu verra fyrir suma skjólstæðingana mína og kostar í oft mikið japl, jaml og fuður þegar frídagar lenda oft í röð á sömu vikudögum Heimili sem er með þjónustu annan hvern fimmtudag fær til dæmis enga þjónustu í þessum mánuði að öllu óbreyttu, bæði frí á skírdag og sumardaginn fyrsta... hálfur mánuður á milli og reikniði svo Annars alveg hreint dæmalaust góð inn í þennan fína mán... þriðjudag Það er alltaf mjög gott að vera nægjusöm og geta glaðst yfir litlu... ég er til dæmis í skýjunum yfir því að það verður kannski 5 stiga hiti á fimmtudaginn... ég fer eins og sést, yfirleitt ekki fram á mikið   Vona svo að þessi stutta vinnuvika verði ánægjuleg fyrir okkur öll og enda þetta bull með óskum um góðan dag    

Páskafrí ! :)

Í dag hefst páskafríið mitt og í dag lýkur páskafríinu mínu... Annars er þetta nú ekkert búið að vera erfitt, svona fyrir utan þau leiðindi að keyra hvað eftir annað, bæinn þveran og endilangan til að heimsækja fólk sem hefur gleymst að tilkynna að er að heiman... Fúlt eiginlega, blöndur af misskilningi og tillitsleysi hjá aðstandendum, en fólk er allavegana og það er þess vegna sem það er svo áhugavert... Farin að pæla í hvort ég sé að missa alla bloggvinina mína yfir á Fésbókina... ég er þar líka, búin að vera í tvö ár eða svo en nenni ekkert að hanga þar... kíki inn nokkuð reglulega þegar ég hef tíma en fatta ekki hvernig maður getur ánetjast... og þá hverju ? Gengur svakalega vel með lopapeysuna sem ég er að prjóna, búin með bolinn og aðra ermina samt að prjóna úr léttlopa... enda ekki gert mikið annað undafarna daga... jú og vinna smá... og smá húsverk... og taka á móti mörgum yndislegum gestum Eldamennskan hefur algerlega hvílt á herðum hins helmingsins af okkur... enda á hann eldhúsið gjörsamlega skuldlaust þegar ég er að vinna á kvöldin. Í kvöld elda ég, læri og við erum búin að bjóða strákunum mínum, tengdadóttur og barnabarni í mat... vildi að stelpan mín gæti komið líka en það gerist seinna, á þessu ári vona ég   Eigið nú góðan dag, öll sem eitt

Gleðilega páska :)

Páskarnir eru fyrir mér bara frí, svo til þess að vera sjálfri mér samkvæm ætti ég að óska öllum gleðilegs páskafrís... en ég sleppi því, ég gæti móðgað einhvern og það er óþarfiHéðan er það helst að frétta að það er alls ekkert að frétta... svona frekar aðgerðarlaus tilvera en ósköp notaleg samtÞað stóð til að mála baðherbergin og laga til í kjallaranum... lesist: "ég ætlaði að láta gera það"Var sjálfsagt að hafa áhyggjur af því að hinum helmingnum af okkur sambýlingunum mundi leiðast allt þetta frí á meðan ég væri í vinnunni... en það eru ástæðulausar áhyggjur og hverri manneskju hollt að hafa bara frí í fríum...Ég er að prjóna lopapeysu... hélt nú eiginlega að ég væri hætt því samt...Í hvert skipti sem ég klára lopapeysu lofa ég sjálfri mér að það sé sko síðasta peysan... búin að lofa því í einhver hundruð skipti í gegn um árin... iss og bara hnuss líka ekki orð að marka skal ég segja ykkur, meira að segja svo alls ekkert að marka, að ég er strax búin að ákveða næstu peysu og bara hálfnuð með bolinn á þessariFór í gær í nýja Bónus til að versla páskaegg... á síðasta snúningi auðvitað og einu eggin sem voru eftir voru svo risastór að ég steinhætti við og fór í aðra verslun og fékk eitt miklu minna og sá þegar ég var komin með það heim, að innan í því voru miðar fyrir heila fjölskyldu á einhverja barnateiknimynd í bíó... það var nú aldeilis alveg stórfínt skoMuna: alltaf að hafa gleraugun með í búðir og ekki bara hafa þau með... setja þau á andlitið líkaEn það er alltaf gott að eiga mörg barnabörn, núna get ég verið svona ofboðslega góð amma og boðið heilum hópi í bíó... með afa sínumLátið ykkur líða vel elskurnar mínar, það ætla ég að gera  

Hugmyndaflugið ;)

Sá þessi líka flottu starfsheiti á miðli...Þjóðvegaumhverfisfræðingur... það ku vera nýtt orð yfir götusópara... svo fólk sæki frekar um að vinna við götusópun. Menntastofnunarmenningarráðgjafi er þá eðlilega skólaliði.... Framlínuviðskiptastuðningsfulltrúi er eins og þið hljótið nú strax að fatta, starfsmaður á skiptiborði, áður símadama. Annars er eftirlætisorðið mitt í þessari upptalningu  eldsneytisfærslufræðingur... hver fattar ekki að þar er á ferð bensínafgreiðslumaður... ? Mér mundi aldrei detta í hug að sækja um einhverja vinnu sem heitir eitthvað sem ég skil ekkiVar að velta fyrir mér mínu starfsheiti, starfsmaður heimaþjónustu... ferlega litlaust miðað við upptalninguna hér á undan. Heimilisþrifnaðarráðgjafi... hljómar vel en kannski ekki nógu langt og á kvöldin gæti ég þá verið í staðinn fyrir starfsmaður kvöldþjónustu, eins og þið sjáið afskaplega flatt og algerlega laust við allt hugmyndaflug, t.d. viðveruskemmtunarstuðningsfulltrúiNei mig skortir hugmyndaflug í þetta... og ég sem er alltaf svo fersk á morgnana, sérstaklega á morgni eins og þessum... sólin er komin upp og það er frekar lítill snjór eftir, nema í safnhaugunum hér og þar á bílaplönum. Bílaplanið okkar er að vaðast upp í drullufen og það er að pínu æðislegt... þýðir að það er að koma vor og við verðum að að fara að láta moka drullunni í burtu og setja möl í staðinnFerlega góð inn í daginn skal ég segja ykkur, alveg í hálfu páskafríi næstu fjóra daga og svo eru bara 4 daga vinnuvikur þangað til ég klára sumarfrí ´08 í byrjun maíMegi dagurinn verða ykkur góður og allir páskadagarnir bara líka  

Nota verkjastíl´og stauta...

... geng með göngugrind og tauta... haltu kjaftiFúlar á móti voru stórskemmtilegar í leikhúsinu í gærkvöldi, akkúrat svona skemmtun sem ég vil sjá og ég ætla að verða eins og persónurnar í þessu leikriti þegar ég verð miðaldra... ef ég verð það einhvertímannÉg held því nebblilega fram að ég geti bara ekki vitað hvenær ég er miðaldra fyrr en ég er öll... þá deili ég með tveimur í aldurinn sem ég náði og þá fyrst kemur það í ljós ! Þess vegna verð ég líklega að fresta því enn um sinn...Ég fer helst bara á leiksýningar sem ég veit að ég get hlegið að... er víst ekki menningalega sinnaðri en það, en mér er alveg sama. Það gerist svo margt sorglegt, ljótt og ruglingslegt í veröldinni svo ég tel það ekki skemmtun að horfa eða hlusta á eitthvað þannig, sem sett er fram sem listHeyrði haft eftir kunnum listamanni hér í bæ að það er ekkert til sem heitir góð myndlist... annað hvort finnst þér mynd vera falleg eða þér finnst hún vera ljót... ekkert flóknara en þaðÞað má þá líka segja það sama um leiksýningar, annað hvort finnst þér þær skemmtilegar eða leiðinlegar. Fyrir mörgum árum fór ég á leiksýningu sem hét Selurinn hefur mannsaugu, hjá áhugaleikfélagi... þetta var allt mjög vandað... leikurinn frábær sérstaklega hjá aðalleikkonunni, en þó ég hefði átt að bjarga lífinu með því, þá gat ég ekki fundið söguþráð... hvað þá hlegið...Þetta var svo mikið svona staraþegjandiútíloftið leikritAnnars ferlega góð inn í daginn og er að fara í þrif 102, skúraði allt í gær... tek restina núna á eftir plús það að baka skúffuköku og helst líka kleinurVona að þið eigið líka sælan sunnudag elskurnar mínar allar þarna úti