Mars...

... heilsar hér með sól í morgunsárið... ekki kannski alveg glampandi strax en það stendur til bóta.  Fyrsti marsmánuðurinn minn í þessu húsi og sólin skín inn um austurgluggann í eldhúsinu og alla gluggana sunnan á húsinu... alltaf gaman að upplifa eitthvað nýttVið fluttum hingað í apríl í fyrra og það má með sanni segja að vorið hafi farið fram hjá okkur...Við byrjuðum strax á að rífa allt út úr eldhúsinu og þá meina ég allt og sáum svo hvorki veginn né daginn í nokkra mánuði fyrir ryki og framkvæmdagleðiÞegar eldhúsið var nokkurnveginn búið drifum við okkur í að gera nýtt gólf og skápa í svefnherbergið og vorum fyrst að fara að sjá út úr augunum í júlíNúna ætla ég að njóta þess að fylgjast með vorinu koma og breytast í sumarOk ég veit... það er ekki alveg strax, en það nálgast samt óðflugaNúna ætla ég að snúa mér að mánaðarlegri vinnuskýrslugerð eins og það er nú gaman... eða eiginlega alls ekki og vinna svo síðasta kvöldið í þessari kvöldvinnuviku. Þetta er bara yndislegur dagur ! Ok sólin skrapp aðeins frá á meðan ég var að skrifa þetta... en hún kemur vonandi aftur...

Njótum dagsins öll sem eitt

Dæs.... ;-)

Við hvern á ég að tala til að fá fleiri klukkutíma í sólarhringinn, allavega aðra hverja viku ? Mér finnst allt ganga svo hægt hjá mér, kem engu í verk en dagarnir líða svo hratt... Það er svo mikið "inn" núna að segjast ekki hafa tíma til að blogga af því að Fésbókin tekur svo mikinn tíma... ég er að vísu á Fésbók en það er ekki hún sem tekur tímann frá mér. Það er vinnan, fjölskyldan, vinnan, prjónarnir, vinnan, heimilið og vinnan sem étur upp minn tíma... svo eins og venjulega þá er þessi hérna kona meira "út" en "inn" Annars er ég alltaf að sjá það betur og betur að ég er barasta alveg ágæt, minni mitt er frábært... ég man ekki til þess að ég gleymi yfirleitt neinu, ég hef bara einn galla... hann er sá að ég hef allt of marga galla og ég geri aldrei sömu mistökin tvisvar, geri alltaf ný og ný... Semsagt fullkomið eintak af hryllilega venjulegri manneskju... Nenni eins og oftast áður ekki neinni stjórnmálaumræðu hérna, læt aðra um hana en fylgist alveg með samt... Það er enginn samdráttur í nýju vinnunni hjá spúsa mínum, hann er að vinna í allan dag ! Honum líkar þessi vinna mjög vel og finnst þetta nú eiginlega allt of auðvelt en skemmtilegt ! Ég er aftur á móti í fríi í dag eða til klukkan 3 þá fer ég af stað... missi af bloggvinahittingi á Karólínu... mér finnst það leiðinlegt ég hefði viljað hitta augliti til auglitis mína góðu bloggvini En það hlýtur að koma að því Núna ætla ég að fara að sinna ekkialvegáhugamálinu mínu... þrifum... í sjálfboðavinnu hérna heima...   Mér er nú samt ekki eins leitt og ég læt, ég elska þetta hús og hef gaman af því að hafa það hreint og snyrtilegt... Dásamlegur dagur, klukkan er bara 8 að morgni og það er orðið bjart !!!! Njótið dagsins elskurnar mínar allar

Í gær fín frú, í dag... ;-)

Það er ekkert atvinnuleysi hjá snjómokstursmönnum hér á norðurhjaranum, sem er gott Þeir voru byrjaðir að hreinsa götuna okkar um 6 leitið í morgun, enda mikil umferðargata og verður að vera vel fær. Það er ekki bara verið að skafa, það er líka verið að keyra snjónum í burtu, í sjóinn held ég... þetta er frábær þjónusta Að vísu eigum við tvo jeppa sem ráða alveg við smásnjó, en það eru ekki allir á svoleiðis farartækjum. Annar jeppinn okkar er samt með þeim ósköpum gerður að hann virkar ekki ef það er meira en 5 stiga frost... það hefur að vísu ekkert með sjálfan bílinn að gera, það er olían sem notuð er á hann Ekki matarolía samt, en olía með allt of miklu parafíni... Liður í heimilissparnaði að nota þá olíu, hún fékkst ókeypis og í öllum frostunum undanfarið er hægt að spara hana líka af því að þá er bíllinn bara alls ekkert nothæfur Talandi um sparsemi... geri aðrir betur ef það er þá hægt Annars er þessi kona ferlega góð inn í þennan fína fimmtudag, í gær Öskudag var ég Fín frú Eyddi megninu af miðdeginu á snyrtistofum bæjarins... ekki að syngja fyrir nammi samt, fór fyrst í klippingu í öðrum enda bæjarins og síðan í lit og plokk í hinum endanum. Fannst ég rosalega fín þangað til ég leit í spegil í morgun sem aldrei skyldi verið hafa... mitt fínufrúarhár leit út eins og það hefði bæði lent í ofsaroki og hrærivél... Tossamiði: muna að laga hárið áður en ég fer að vinna, svo ég hræði ekki líftóruna úr skjólstæðingunum Vona að þið eigið öll góðan og blessaðan dag, muna svo bara að hafa vettlingana á höndunum... þeir virka betur þar en í vösunum  

Hlýt ég þá ekki að kjósa...

... Framsóknarflokkinn ? Hann ætlar sko að lækka vextina og fella niður lán...... ferlega flott loforð, allir voða glaðir og hvenær gerist þetta svo ? Æi piss off ! Ég er ekki alveg glær í gegn sko, það er ekki eins og þetta sé fyrsta kosningabaráttan sem ég hef upplifað um ævina... Það er enginn vandi að gefa loforð hægri/vinstri... en þá fyrst vandast málið þegar þarf að standa við þau og það er afskaplega sjaldgæft að það gerist þegar þessir pótintátar komast svo til valda ! Enda alltaf haft megnustu andúð á kosningabaráttum... þá er aldrei meira logið og aldrei fleiri sem ljúga einum rómi, saman í stórum hópum... eins og engisprettufaraldur eða eitthvað álíka Þá fyrst fer ég að taka mark á því fólki sem gefur sig út í stjórnmál þegar það fer einu sinni í hverjum mánuði í vinnustaðaferðirnar, alltaf allan tímann sem það situr á þingi ! Sýna sig, sjá fólið sem það er að vinna fyrir, fylgjast með ! En ekki bara sýna fólkinu í landinu alveg brjálæðislegan uppgerðaráhuga korteri fyrir kosningar ! Barnalegt ? Sjálfsagt, , en það er bara svo áberandi mikill raunveruleikatengslaskortur á þeim annars virðulega vinnustað ! Ég er ekki alveg viss um hvað ég ætla að kjósa, veit samt alveg hvað ég ætla ekki að kjósa... Það er bara ekki nóg vegna þess að auðvitað kýs ég !  Líklega kýs ég samt hana Jóhönnu, en ég ætla ekkert að fara að segja ykkur frá því og get alveg skipt milljón og þrisvar sinnum um skoðun fram að kosningum   Annars bara ferlega góð inn í daginn, búin að ausa úr mér yfir ykkur og er núna ljúf sem lamb...   Sprengidagur runninn upp með allskonar ofátsfyrirætlunum, en ekki á þessu heimili samt... kokkurinn er nefnilega farinn að vinna úti allan daginn og má ekkert vera að þessu Svo Sprengidagurinn verður bara haldinn með pompi og prakt næsta mánudag, þá elda ég af því að þá er ekki kvöldvinnuvika Góður dagur í sjónmáli, njótum hans  

Það er aldrei hægt...

... að gera svo vel að öllum líki... tökum til dæmis í morgun þegar ég skrapp í búðinaÞar hitti ég "ekki alveg jákvæðustu manneskjuna í öllum heiminum" og henni fannst ég ekki nógu vel til fara svona á almannafæri...Liti nú eiginlega bara út eins og pokakerling, í peysu sem var svo síð að hún náði langt niður fyrir fínu rolluna mína, með risastóran trefil og í kuldastígvélum sem ég hafði ekki nennt að renna upp áður en ég skrapp í búðina í 4 mínútur, svo þau flöksuðust bara einhvernveginn á fótunum á mérSkil ekki af hverju hún sleppti því að nefna það í leiðinni að ég hafði heldur ekki farið í lagningu og var algerlega ómáluðAð vísu mála ég mig aldrei og að fara í lagningu er svona fyrirbæri sem ég hef bara heyrt um en aldrei prófað, enda oftar en ekki eins og útigangshross um höfuðiðOg þetta með klæðaburðinn er nú bara afskaplega rétt hjá henni blessaðri, ég er oft þannig til fara að það mætti halda að ég hefði ætt í tryllingi afturábak í gengum fataskápinn minn, með lokuð augun... í myrkriOg ég er svo innilega kærulaus að mér er alveg sama hvað öðru fólki finnst um það eða hvort því finnst yfir höfuð eitthvað um þaðÉg sló hana algerlega út af laginu með því að brosa mínu blíðasta og segja að við gætum nú bara ekki allar litið alltaf eins flott út og hún, bað hana vel að lifa og fór heim... skellihlæjandi og hlæ ennþáÞað er svo gaman að það skuli vera til fólk sem tekst að skemmta manni alveg án þess að ætla sér það... bara dauðóvart

Njótið dagsins elskurnar mínar allar

Til hamingju með daginn :-)

... ég sjálf og allar aðrar konur allsstaðar Í dag er auðvitað konudagurinn, einn af 364 á ári... sá þrjúhundruðsextugastiogfimmti er auðvitað bóndadagurinn, það er nú ekki eins og ég sé með einhverja frekju  og af því ég er að fara að vinna kvöldvinnuna þessa viku þá er líka Bolludagur, Sprengidagurinn verður svo á mánudag eftir viku... læt Öskudaginn alveg vera Ég er búin að hóa í 3/7 af börnunum okkar í bollukaffi, hin 4/7 búa úti á landi og í útlöndum og mér finnst það alltaf svo ferlega fúlt Mér er bæði ljúft og skylt að taka það sérstaklega fram að ég bakaði ekki bollurnar, ég keypti þær í Bónus Það ruglaðist eitthvað með kvöldvinnuna mína í öllu afleysingaveseninu síðasta sumar, vegna þess að ég vann líka þessa daga í fyrra... en það er ekki hundrað í hættunni Spúsi er búinn að vera atvinnulaus síðan fyrsta desember en nú er hann búinn að fá vinnu, meira að segja vélavinnu sem honum líkar vel Hann fór í viðtal á fimmtudaginn og þeir réðu hann eins og skot og hann byrjar á morgun   Þetta var einstök heppni, það er ekki um auðugan garð að gresja, en þeir eru líka heppnir að fá akkúrat hann í vinnu hjá sér Það snjóar núna ofan í slabbið sem myndaðist í gær og mér er bara alveg sama og er ferlega góð inn í þennan fína sunnudag og vona að þið séuð það líka  

Lyftudrasl...

Hvern virkan dag þarf ég í hús þar sem er lyfta... mér er ekki vel við lyftur en í þessu húsi þarf að fara niður í kjallara til að komast lykillaus inn í stigaganginn og ég má ekki vera að því... eða svo ég segi nú alveg satt þá er mér líka illa við stóra mannlausa kjallara í ókunnugum húsumÉg er eiginlega eins og hálfviti þegar ég fer í þessa lyftu...Á meðan ég bíð eftir að hún komi, passa ég mig að standa hæfilega langt frá hurðinni ef einhver skyldi koma út, en ég er búin að koma þarna í marga mánuði og aldrei séð hræðu...Ég sting alltaf hausnum inn fyrst... varlega, til að gá hvort það sé einhver þar, lyftukassinn er nefnilega þversum, snýr þannig að ég sé hann ekki allan þegar ég stend fyrir framan. Ég þarf upp á fjórðu hæð og allan tímann brestur og brakar og ískrar í öllu saman draslinu, hristist, hoppar og skoppar og hurðin opnast áður en hún stoppar á hæðinniOg þegar hún loksins stoppar þá tekur hún svona eitt lokahopp, spes fyrir mig ábyggilega og ég held alltaf að hún sé að fara strax niður aftur svo ég hendist afskaplega lítið virðulega út í ofboði...  Nokkrum sinnum hef ég flýtt mér svo mikið að komast út úr þessum óskapnaði að ég hef ekki tekið eftir því að hún er alls ekki á réttri hæð... þá er eins og einhver hafi ýtt á takkann á viðkomandi hæð en það er aldrei neinn þar... Svo þegar ég fer niður aftur þá endurtekur þetta sig, bara í öfugri  röð og ég er alltaf fegin þegar ég kemst út á fyrstu hæðinni...Eitt skiptið fór hún með mig niður í kjallarann...  ég ýtti samt á takkann þar sem stendur 1...Mér var nú ekki alveg sama svona rétt á meðan hurðin var að lokast aftur, en hún skreiddist með mig á rétta hæð og ég æddi í hendingskasti út úr húsinuÉg er að segja ykkur það, ég er eins og hálfviti þegar ég þarf að hafa samskipti við þessa lyftu

Njótið dagsins elskurnar mínar allar

Það snjóaði...

... aðeins í nótt, rétt svona til að allt lítur snyrtilegar út og rykið af götunum er þá minna Ég keyri talsvert í sambandi við vinnuna mína og þegar sólin er komin þó þetta hátt á loft, þá leynir rykið sér ekkert þar sem bílarnir æða um... Stundum liggur við að gangandi vegfarendur hverfi í rykskýi   Það er auðvitað ekkert allt slæmt við snjóinn, þó mér finnist yfirleitt að hann megi missa sín. Annars góður dagur í uppsiglingu eins og ævinlega, það má alltaf finna eitthvað jákvætt, líka við snjóinn   Ég hef svolítið verið að velta því fyrir mér með allskonar töflur sem fólk innbyrðir... við tímabundinni andlegri vanlíðan. Þegar ég fór frá mínum fyrrverandi og föður barnanna minna, þá leið mér að sjálfsögðu ferlega illa... erfiðasta sem ég nokkurtímann gert... sérstaklega að rífa börnin upp. Fór með þau og mikið af skuldum, en átti ekkert upp í þær og hafði enga vinnu. Ég var hrædd við framtíðina, kveið fyrir því að geta ekki séð sómasamlega um börnin mín verandi ein með þau, ég var eiginlega viss um að ég gæti alls ekki ráðið við þetta verkefni Ég lá andvaka heilu næturnar af hræðslu og kvíða og það kom sér ekkert sérlega vel þegar ég var loks búin að fá vinnu og þurfti að mæta klukkan 6 á morgnana En aldrei nokkurtímann datt mér í hug að það væri bara hægt að fá töflur við öllu þessu Svefntöflur til að sofa, róandi til að slá á mestu hræðsluna og svo er líka  hægt að fá töflur við kvíða. Líklega hefði mér þá liðið betur á meðan allt gekk á, synt í gegnum þetta allt saman í töflurússi en einhvertímann hefði ég þurft að hætta að éta þær og hefði ég þá ekki bara þurft að fara að vinna úr allri vanlíðaninni, eftirá... Ég veit það ekki það reyndi ekkert á það, mínar "töflur" voru til dæmis dásamlegar systur sem hjálpuðu mér svo mikið í gegnum þetta Þær eru svo assgoti skynsamar, en ekki segja þeim að ég hafi sagt það Æi passið ykkur nú svolítið á töflunum, þær  lækna ekkert... þær bara fresta... Jæja nú er ég hætt þessu röfli og farin í Konu/mömmu/ömmudagskaffi á leikskólanum hjá sonardóttur minni   

Einu sinni átti ég hund...

... ofurlítið heimskan... Æi nei nei, hann Vaskur minn var ekki heimskur, bara illa upp alinn þegar við X fluttum í sveitina með börnin okkar og eiginlega erfðum hann Hans besta skemmtun var að hlaupa í rollurnar þegar þær voru úti og gelta eins og óður og hann átti það líka til að glefsa í nokkra afturfætur til að hressa aðeins meira upp á hópinn, sem auðvitað tvístraðist út um allt...   Alveg sama hvað hann var skammaður mikið fyrir þetta, hann lét sér ekki segjast... aldrei   Hrafnarnir höfðu hryllilega gaman af því að atast í honum og ég verð nú að viðurkenna að þá fannst okkur hann virkilega heimskulegur, hann lét þá plata sig endalaust... og aldrei virtist hann læra neitt af því... Það endaði alltaf með því að hann skreið heim gjörsamlega uppgefinn og fannst hann eiga að fá helling af samúð... sem hann fékk auðvitað Hann var dásamleg barnapía, hvorki ósvífnum hröfnum né rolluskjátum tókst að rugla hann í ríminu ef börnin voru úti þegar þau voru lítil... hann vék bara ekki frá þeim. Sá yngsti fæddist eftir að við fluttum í sveitina og Vaskur gamli tók hann að sér... Þegar sá stutti var orðinn nógu stálpaður til að vera sjálfur úti, þá var alltaf hægt að treysta því að hann komst ekkert upp með að álpast eitthvað út í loftið... ef hann var í sandkassanum lá hundurinn þar við hliðina, ef hann labbaði eitthvað fylgdi Vaskur honum eins og skugginn og ef hann kom of nálægt skurði að mati Vasks, þá beit sá gamli í úlpuna hans og dró hann frá... ég sá það svo oft Hann huggaði þau líka ef þau fóru að gráta, en ef þau þóttust vera að gráta þá gerði hann ekkert með það, hann var nú ekki heimskari en það Hann var fallegur íslenskur fjárhundur, dásamlega blíður og góður, en hann bókstaflega brjálaðist ef einhver gerði börnunum eitthvað, þá varð hann svo reiður að hann varð næstum því ljótur... Einu sinni hrakti hann stóran bolakálf í burtu frá eldri drengnum, sá hafði haft drenginn undir og lék sér að því að hnoðast með hann smástund, sem betur fer var hann ekki með horn og drengnum mínum varð ekkert meint af, bara hræddur auðvitað En sá gamli sá þetta og klikkaðist, rauk í bolann eiginlega öskrandi af reiði, hef ekki síðan heyrt svona hljóð frá neinum hundi og hrakti hann á undan sér þangað til hundrað kílóa bolakálfurinn hörfaði í ofboði út að girðingu, datt aftur á bak yfir hana og lá góða stund afvelta, hinum megin við girðinguna... þetta var stórkostlegt Við eigum svo margar  góðar minningar um þennan litla hugrakka, blíða og trygga hund  

Gera og græja takk !

Tók bara einn dag í sumarfrí í bili, er að reyna að vinna niður daga sem ég átti eftir síðan í fyrra... held ég eigi ennþá 10 daga eftirSat eiginlega bara mestmegnis og röflaði einhverja vitleysu, rétt eins og stjórnarandstaðan á okkar háa Alþingi...En ég var í fríi... þau eru í vinnunni, svo ég má ætlast til þess af þeim að þau vinni vinnuna sína, en sitji ekki bara og bulli einhverja vitleysu alla daga... "Ég sagði þetta um daginn, það var ég sem samdi þetta, ég var á undan, þú ert að stela  hugmyndinni minni..." kjaftæði sem engu skilar öðru en að álitið á þeim minnkar bara ennþá meira, ef það var þá hægt...Gera og græja takk ! Sameinast í því að bjarga því sem bjargað verður, þegar það er búið þá má bulla út í eitt fyrir mér...Annars ferlega góð inn í daginn baraFarin að sjá vorið í hyllingum... það er búið að vera svona smá sýnishorn af því hér undanfarna daga, en nú á víst að kólna aftur...En þar sem ég get ekki stjórnað því þá læt ég það ekki ergja mig, en ég verð nú samt að viðurkenna að þolinmæðin mín er að verða svolítið stutt í annan endannEn þetta keeemur... góðir hlutir geeerast hææægt og svo framvegis

Góður dagur framundan, verum góð hvort við annað, það skilar sér alltaf