Eftir því sem ég hef minna að gera...

... þess minna nenni ég að gera Janúar og febrúar eru hreint ótrúlega tilbreytingalausir mánuðir, mér hefur alltaf fundist það. Mars var líka með í því þangað til yngri sonur minn þessi elska, fæddist í þeim mánuði Sjálfsagt má reyna að setja þetta á einhverskonar skammdegisþunglyndi, en þá er ég auðvitað öfug við annað fólk... eins og með svo margt annað Sólin er nefnilega að hækka á lofti og þá passar ekki að vera með skammdegisþunglyndi, enda mundi ég aldrei viðurkenna að ég væri með það Ég sef samt alls ekkert meira, af því bara að ég þarf þess ekki, en mér var nú samt ráðlagt að prófa bara að fá mér svefntöflur við því... Halló... fyrr mundi ég nú dauð liggja skal ég segja ykkur, ef ég get ekki sofið þá er ég ekki syfjuð og þá fer ég bara á fætur og mér er nokk sama hvað klukkan er... aldrei dytti mér í hug að fara að taka lyf við engu Annars ferlega góð inn í daginn, engin kvöldvinna þessa vikuna og ég sit eftir vinnu á daginn og púsla... ef ég þá nenni því... Nei nei ég er ekki bara löt ég er líka svolítið lygin, mér tekst alltaf að finna eitthvað að gera hérna heima og ef ekki vill betur til erindast ég fyrir gamla fólkið sem ég vinn hjá, í sjálfboðavinnu... biluð gleraugu hér, vottorð þar Ég held það sé hláka úti, allavega heimtar vor háeðla heimilisköttur að fara út Hætt þessu bulli, eigið dásamlegan dag elskurnar mínar, ég ætla að fara að hleypa kettinum út     

Litli rökfræðingurinn ;-)

Við fórum í gær að versla á Glerártorgi, sonardóttir mín hún Linda Björg þriggja ára og ég. Hún er skýr og skemmtileg stelpa og alltaf meira og meira gaman að fara með henni eitthvað. Börn eru dásamleg, en einhvernvegin á ég nú alltaf auðveldara með að umgangast þau þegar þau eru farin að tala, ég er alls ekkert flink að lesa í skælurVið fórum meðal annars í Tiger og þegar ég fór að skoða þar lesgleraugu, með gleraugu á nefinu þá fór hún að hlægja: Amma mín, af hverju þú að skoða gleraugu, þú á gleraugu... Já ég þarf að fá mér fleiri og líka handa afa, hann týnir stundum sínum. Hún tók þetta gott og gilt, en þegar við fórum svo fram hjá leikfangaverslun þar sem við sáum meðal annars stórt hlið búið til úr blöðrum, kom skeifa á fallega andlitið hennar og hún sagði: Ég sarr að fá fleiri blörrur... Nú af hverju spyr ég... Hann pabbi minn sprengdi blörruna mína... Og af hverju á ég að kaupa handa þér blöðru, þegar það var pabbi þinn sem sprengdi þína ? Hún horfði á mig smástund og sagði svo: "Þú mamman hans pabba míns"Ég þarf sjálfsagt ekkert að taka það fram að ég fór með þennan yndislega litla rökfræðing inn í búðina og keypti handa henni poka fullan af blöðrumÆtla nú samt ekki að hafa það sem reglu, pabbi hennar er ráðsettur maður, giftur til margra ára og bráðum tveggja barna faðir og það sem hann skemmir á hann að bæta sjálfur, hann er löngu kominn úr ábyrgðEn á meðan það er ekki eitthvað stærra og dýrara sem hann sonur minn skemmir fyrir blessuðu barninu, þá læt ég það veraOg eins og ég segi alltaf þegar ég er að láta eftir henni: Ég er amman, ég má þaðEigið dásamlegan dag elskurnar 

Pé ess: Ég setti inn myndir af eldhúsgluggunum mínum, allir kapparnir komnir upp og allir eins 

Meindýr ?

Útigangsfólk er þekkt fyrir að reyna að koma sér fyrir í yfirgefnu húsnæði, þar sem það getur fengið að vera í friði... leiðréttið mig endilega ef ég er að fara með einhverja vitleysu. Einhver vinnuskúr á yfirgefinni byggingarlóð í Borg Óttans varð fyrir valinu og íbúar þar í kring kvörtuðu... svo sem ekkert um það að segja, sjálfsagt ekkert notalegt sambýli...Yfirverkfræðingur hjá byggingarfulltrúa í þessari sömu borg var að tjá sig um málið og kallar útigangsfólkið meindýr... Djöfull finnst mér það kuldalega til orða tekið um fólk... og þá sérstaklega ógæfufólk, sem útigangsfólk hlýtur að vera. Það fer varla nokkur manneskja sem lífið leikur við, út og fer að búa á götunni bara svona að gamni sínu. Ég hef samúð með útigangsfólki, það hefur þessi blessaður verkfræðings... ætlaði að skrifa tittur en hætti við... greinilega ekki

Fyrir jólin í fyrra var sett upp risastórt, lýsandi hjarta hérna yfir í Vaðlaheiðinni og fyrst núna sé ég það út um glugga á húsinu mínu. Ég held samt ekkert að það hafi verið fært til, ég horfi greinilega ekkert mikið út um þennan glugga, hann snýr nefnilega bara að næsta húsiEn ef ég fer svo og horfi aðeins fyrir ofan þakið á næsta húsi, sem mér hefur einhvernvegin ekki dottið í hug fyrr en í morgun, þá sé ég hjartað mjög vel. Gott að sjá það þarna án þess að þurfa að fara út að keyra, minnir mig á allt það fallega og góða sem er vissulega til í lífinu og í veröldinni

Í dag er ljúfur laugardagur og líka dagurinn sem nýju eldhúsgardínurnar mínar komast loks fyrir glugganaÉg hneykslaði fullorðna konu þegar ég var að lýsa því fyrir henni að ég væri hálfnuð... rauður efri kappi og litlaus neðri kappi fyrir öðrum glugganum og svo öfugt fyrir hinum. "Gevööð, ég ætla að vona að gluggarnir þínir snúi ekki út að götunni, svona mundi ég aldrei gera, þó svo ég byggi í sveit og gluggarnir sneru til fjalls" ! Jæja, mikið er nú gott að við erum ekki öll eins

Eigið góðan dag þið öll þarna úti  

Hlustandi vs talandi...

Var að velta fyrir mér hvað þarf til að vera góður hlustandi... í sjálfboðavinnu það er að segja. Öll ættum við auðvitað að geta verið það... við höfum jú tvö eyru, en bara einn munn Ég get alveg verið góður hlustandi, það er að segja ef það kemur ekki bara endalaust og eintómt helíum rugl frá talandanum og alltaf það sama Hæfileikar mínir sem hlustanda, fara þá óðum þverrandi og þá get ég yfirleitt ekki setið á mér, en það er ekki nógu gott, af því að hlustandinn á nefnilega að þegja og hlusta Það eru samt takmörk fyrir því hvað það er hægt að ausa miklu yfir mig, en svo er á það að líta að kannski þarf talandinn bara að koma út úr sér bullinu og losa sig þannig við það, það gerist alveg og telst bara nokkuð eðlilegt En sumir virðast bara alltaf hafa nóg af fjandans bulli til að ausa úr sér og þá skortir mig þolinmæði og á það til að setja mig í dómarasæti... Of margir fyrir minn smekk, gera nefnilega ekkert annað en að kvarta og sífra yfir öllu, vilja ekkert annað og gera ekkert annað og það er óþolandi, fyrir mín eyru allavega og slíkt hæfir auðvitað ekki góðum hlustanda Þegar það er svo einbeittur brotavilji í gangi, þá lokast á þolinmæðina mína... hún lætur sig hverfa og svo forðast ég líka meðvirkni af miklum móð Í sumum tilvikum gerir maður nefnilega engan greiða með því bara að hlusta, það er klárt og þá geta komið frá kvikindinu mér svona sætar litlar setningar eins og: "Hættu nú þessu endalausa væli og reyndu að gera eitthvað í þínum málum" og eitthvað fleira svoleiðis og þá er mér nú yfirleitt sparkað úr djobbinu Annars ferlega góð inn í daginn og með helling af þolinmæði, það hefur ekkert tæmst út af henni það sem af er þessum fína fimmtudegi, sem eðlilegt er Fer ekki fet út úr húsi fyrr en klukkan 10 og þá í vinnuna með ánægju, kvöldvinnan er líka auðveld þessa dagana... indælis fólk allt saman, ekkert margir og engir erfiðleikar... hvað er hægt að hafa það betra ? Eigið góðan dag, í allan dag elskurnar mínar allar     

Skræpótt...

Það er gott að geta hlegið og beinlínis bráðandskoti nauðsynlegt... við hættum nefnilega ekki að hlægja af því að við verðum gömul... við verðum gömul af því að við hættum að hlægjaÉg var að lesa frétt um stúlkutetur í USA sem virðist hafa það eitt fyrir stafni að eyða peningum og forðast ljósmyndara... fyrirsögnin var eitthvað á þá leið að hún hefði keypt sér bíl í stíl við fötin sín...  Jahérnahér, annað hvort eru þeir sem velja fréttirnar til að birta í íslenskum fjölmiðlum, svona miklir húmoristar eða ég kann ekki gott að meta...Ég las alla fréttina... og fór svo bara að hlægjaOg ferlega góð inn í daginn, þó svo að ég þurfi að mæta núna klukkan 8 á starfsmannafund, en verð þá bara búin fyrr og hef svakalega langa pásu þangað til ég fer í kvöldsnattið. Þessa pásu ætla ég að nota til að sauma ný eldhúsgluggatjöld... enn og afturTjöldin sem ég átti og setti upp í staðinn fyrir mín flottu jólarauðu eru svo litlaus og flöt og beinlínis hættulega niðurdrepandi... og hlupu auk þess í þvottiOg af því að ég læt ekkert komast upp með að draga mig niður, ef ég get með einhverju móti komið í veg fyrir það, þá fór ég og keypti mér rautt efni í þriðju eldhúsgluggatjöldin á innan við áriNúna ætla ég að fá mér fleiri köff og fer svo trúlega út og kaupi mér brjálæðislega skræpóttan bíl, í stíl við brjálæðislega skræpótta trefilinn minn... en líklega verð ég að skrifa um það sjálf, ég held ég eigi ekki nógu mikið af peningum til að teljast gilt fréttaefni... eða eitthvað í þá áttinaEigið góðan dag elskurnar mínar allar og takið eftir því að sólin er farin að sýna sig 

Hóstamixtúra...

Eitt af leiðinlegri fyrirbærum sem ég verð vör við hjá fólki er hroki... ég bara þoli hann ekki og verð  hreint afskaplega skapstygg við hrokafullt fólk og hef enga þolinmæði með því... Því miður, vegna þess að hroki verður til vegna lélegs sjálfsmats og það að hafa lélegt sjálfsmat er líklega með því verra sem manneskja getur þjáðst af... Og þá á ég auðvitað að sýna skilning og hafa þolinmæði, en þar flaska ég yfirleitt... Mér finnst gaman og líður vel með því að hæla fólki fyrir að gera góða hluti og að gera vel Langflestir verða stoltir og vilja þá gera enn betur, en örfáir taka því þannig að þeir virðast bara geta sannfært sjálfa sig enn betur um, að þeir séu sannanlega miklu meiri og betri en allir aðrir og langt yfir aðra hafnir. Það þoli ég ekki, en vona bara að það sé ekki hrokinn í mér sem talar... Það geta allir gert eitthvað betur en einhver annar og allir kunna eitthvað sem einhver annar kann ekki, en það er enginn til sem kann allt og gerir allt betur en allir aðrir. En að halda því fram við fólk sem þjáist af hroka er eins og að hella bensíni á eld... þá er verið að setja út á og gera lítið úr og það kostar sárindi og leiðindi... Ég er enginn geðlæknir eða sálfræðingur og hef enga hæfileika á þeim sviðum og á þá ekkert að vera að reyna að vinna þeirra vinnu, enda löngu búin að gefast upp á að vera eitthvað að teygja mig þangað Mitt sérsvið væri nú frekar heilaþvottur... en ég er ekkert sérstaklega góð í honum heldur... svo ég held mig bara við gólfþvottinn og prjónana... og ryksuguna... og snjóskófluna... Fyrirsögnin á ekkert skylt við innihaldið, ég þarf bara að muna að kaupa hóstamixtúru Eigið góðan dag elskurnar mínar allar og ennþá betri viku, í vinnu eða ekki  

Skyndifærsla... ;-)

Ég vil láta hluti gerast hratt og drífa verkin af, en ég er samt ekki mikið fyrir skyndilausnir Mér finnst alveg með ólíkindum, hvað er hægt að selja fólki... skyndimegrunarkúr, ekkert að gera nema borða einhver efni með og/eða í staðinn fyrir mat. Sápur sem þrífa sjálfar, að vísu virðist mér þegar ég sé þær auglýstar að það verði að horfa á þær á meðan... jú hver vill ekki sitja og horfa á klósettið sitt hreinsast sjálfkrafa... Allt á að gerast sjálfvirkt og enginn á að hafa fyrir neinu... slæmt þegar fólk lætur gabba sig svona... Þetta er auðvitað rosalega þægilegt, sjálfhreinsandi eldhús var eitthvað sem ég vildi lengi vel sjá verða til, ekki lengur samt, ég elska eldhúsið mitt og finnst gaman að hafa það snyrtilegt, en ekki segja neinum að ég hafi sagt þetta, ég vil ekki fyrir nokkurn mun missa kúlið sko Annars ferlega góð inn í daginn og kom því í verk að setja inn mynd af dúllunni minni litlu henni Lindu, á skíðum í Svissnesku Ölpunum... með snuðið Hér snjóar eins og hellt væri úr einhverju, fatan er víst notuð þegar rignir, en kannski má bara líka nota hana þegar snjóar   Búin að taka niður allt jólaskraut og pakka því niður... mikið búin að reyna að senda kassana sjálfa upp á háaloft, en ekkert gerst ennþá... Líklega verð ég þá að setja þá þangað sjálf, fer í það núna... kannski... ef til vill... Hætt þessu bulli, eigið sælan sunnudag elskurnar mínar allar

Helgarfrííííííí.........

Til að geta sagt frá því hvað snjóaði mikið í nótt í sentímetrum talið, þyrfti ég að fara út með málband en það geri ég sko ekki... ég er á náttsloppnum og er þar að auki enginn veðureftirlitsmaður En það snjóaði sem sagt í nótt og mér finnst það í góðu lagi, það er fallegt og ég er í mínu fyrsta helgarfríi á nýja árinu og get hangið inni allan daginn ef mér sýnist svo, sem ég geri kannski... eða þá kannski ekki Kvöldmaturinn er ákveðinn, saltað hrossakjöt... ok ekki beint uppáhaldsmaturinn minn en alveg hægt að borða það og má lengi semja við mig á góðu nótunum Börnin mín neituðu alltaf alfarið að borða hrossakjöt í sveitinni í gamla daga, maður borðaði að sjálfsögðu ekki vini sína, það var þá víst alveg eins hægt að borða hundana Ég hef aldrei átt í neinum sérstökum vináttutengslum við hesta svoleiðis, mér hefur bara aldrei fundist kjötið af þeim neitt sérstaklega bragðgott Það gerist allt mjög svo hægt og rólega þessa dagana, tíminn líður hægt, ég hugsa hægt, hreyfi mig hægt, helvítis kvefið fer óhugnanlega hægt úr mér, jólaskrautið fer mjög hægt og rólega niður í nýju fínu plastkassana... bara slugs í gangi Annars ferlega góð inn í daginn, ákveð alltaf þegar ég vakna á morgnana hvernig mig langar til að dagurinn minn verði, þetta er ekkert meðvitað lengur, ég er búin að gera þetta svo lengi að þetta er löngu orðið sjálfvirkt Gamall vinur minn benti mér á leið til að byrja daginn, þegar mér leið sem verst eftir skilnað í ofsalega gamla daga... Líta í spegilinn og brosa framan í sjálfa mig þangað til brosið var orðið ekta, gott ráð sem ég hef svo spunnið við í gegnum árin Góða helgi elskurnar mínar   

Það er líf eftir jólin...

... sagði svínið ! Er hægt að sýna meiri bjartsýni en þetta ? Eins og mér finnst gaman að halda jól og setja upp jólaskraut og allt þetta yndislega vesen sem því fylgir, þá finnst mér gott að geta tekið það niður líka. Það er tími fyrir jól og það er tími fyrir eftirjól... Ég er alveg búin að taka niður eina jólaseríu... dugleeeg Kötturinn var aðeins byrjaður að taka skrautið af jólatrénu, kannski ekki  endilega af einskærri hjálpsemi samt, en ég kláraði það og tók sundur tréð og setti það í kassann. Við erum sem sagt með gervitré... með 30 ára ábyrgð Kjötlopapeysan er tilbúin, þvegin og fín og liggur til þerris á gólfinu í gestaherberginu... næsta mál á hennar dagskrá er að flytjast búferlum í borgfirska sveit, ásamt húfu og tveggjaþumlavettlingum Þegar við fluttum hingað og stækkuðum þar af leiðandi við okkur húsnæði um ca helming og ég fór að taka upp úr kössum og pokum til að fylla nú upp í tóma skápa og herbergi, fann ég nokkrar peysur sem ég hef byrjað á fyrir einhverjum árum... Ég er alltaf minnst fjórum svoleiðis verkefnum á eftir sjálfri mér, ég hugsa nefnilega hraðar en ég prjóna, samt prjóna ég frekar hratt og kýs svo að fela það bak við tímaleysi að ég skuli ekki klára þetta, það er sko til að letin sjáist ekki Ég var eiginlega búin að plana að vera lasin í dag og hanga bara heima og hósta í einrúmi, en ég er hætt við það... að vera heima sko, ekki hætt að hósta samt fjandinn hafi það... Eigið góðan dag elskurnar mínar, við skjáumst

Sitt sýnist hverjum...

Það er mikið ritað og rætt um Bjarna Ármannsson síðan hann kom fram í Kastljósinu. Hann skilaði einhverjum parti af öllum stjarnfræðilegu fúlgunum sem hann fékk borgaðar fyrir sína stuttu viðveru hjá Glitni. Ég dáist ekkert að þessu hjá honum en kannski er þetta góð byrjun, það er að segja ef þetta er þá byrjun á einhverju, en ekki bara eitt einangrað útspil og svo bara búið... ef það er bara það, þá skiptir þetta engu máli og hann hefði bara eins getað haldið sig heima hjá sér. Það er alltaf hættulegt að vera ekki veruleikatengdur og þessir pótintátar sem eru búnir að vera að leika sér með allar stjarnfræðilegu upphæðirnar, sem við svona venjulega fólkið skiljum ekki, eru svo sannarlega löngu orðnir veruleikafirrtir. Mér finnst allt í lagi að fólk hafi góð laun bara gott mál, en  það verður þá að vinna fyrir þeim, en það gera þessir kónar ekki. Hver haldið þið að sé svo mikill snillingur og geri svo gífurlegt gagn í einhverju fyrirtæki, banka eða öðru að hann sé yfir 60 milljón króna virði á mánuði ? Ok ef hann stendur og fellur með fyrirtækinu og ber virkilega ábyrgð á því, þá má hann græða þegar fyrirtækið græðir, en ætti þá líka að tapa þegar fyrirtækið tapar... En þar liggur nefnilega snilldin... það er líklega til eitthvað annað orð yfir það... þegar fyrirtækið er komið í hættu þá er bara að raka til sín sem mestu af peningum hvort sem maður á þá eða ekki og stinga svo af úr landi! Ég á greinilega ekki heima í þessum flotta fjármálaheimi þeirra þarna, ég seldi fyrirtækið mitt í vor, borgaði skuldirnar sem voru að vísu ekki svo miklar og svo fékk ég bara afganginn... ég er asni... það er klárt ! Eigið góðan dag elskurnar