Bindindindindindi.... ;-)

Þær stuttu stundir tvær sem ég stoppaði hérna heima við fyrripartinn í gær, lék allt húsið okkar á reiðiskjálfi... það var kolvitlaus maður að djöflast með gröfu á lóðinni okkar Að vísu að okkar ósk, að grafa fyrir 40 m2 sólpalli, sem verður smíðaður af okkur sambýliskornunum, næsta sumar... Um tíma sá ég fyrir mér sundlaug þar sem holan blasti við á helmingi lóðarinnar, með dýpi og alles En þá kom risastór vörubíll og sturtaði þremur hlössum af möl beint ofan í sundlaugardrauminn minn og úr varð 40 m2 malarsvæði... Spúsa minn dreymir ekki sundlaugardrauma hann dreymir heitapottsdrauma, verður að segjast að hann er greinilega ívið hógværari í sínum draumum   Annars er allt nokkurnveginn við það sama hérna megin, vinnaétasofaekkihlustahorfáfréttir... ég hefði eiginlega ekkert þurft að skrifa mikið meira, mig bara langaði til þess. Og fyrir þá sem vilja þusa aðeins yfir tilfinnanlegum skorti mínum á fréttaáhuga: ég er ennþá í fréttabindindi og það gengur þrusuvel Við erum hætt við að umbylta stofugólfinu fyrir jólin, eins og upphaflega var áætlað, nennum því ekki og það venst líka svo vel að hafa allt í röð og reglu og ekki allt á kafi í ryki. Viljum njóta þess fram yfir jólin, svo nú set ég upp í stofunni gluggatjöldin sem bíða sér ekki til batnaðar ofan í kassa mikið lengur og leiðrétti myndauppröðunina á veggjunum. Ég setti nefnilega myndir bara á naglana sem voru þarna og sumar myndirnar eru upp undir lofti, en flestar samt enn í kössum Farin í sturtu og svo aftur í vinnu, vona að dagurinn í dag verði besti dagur lífs ykkar hingað til

Hættið þessu strax !

Komst að því í gær að greiðsluþjónustan okkar nýja hafði ekki borgað alla okkar reikninga síðustu mánaðamót... Svo ég hringdi í bankann okkar, einn þessara nýrúlluðu og ætlaði að gá hvort það væri búið að þjóðnýta kaupið okkar líka... enda náttulega slíkar og þvílíkar upphæðir að þær hefðu farið langt með að redda nokkrum bönkum... eða þannig sko Byrjaði að hringja milli 9 og 10, þá fékk ég samband við símsvara, sem sagði mér svona um það bil 50 sinnum að þjónustufulltrúar mundu aðstoða mig eins fljótt og auðið væri, ef ég bara biði augnablik... Augnablikið mitt varði í hálftíma og þá þurfti ég að fara í vinnu svo ég sleit þessu svolítið einhliða einkasamtali mínu og símsvarans... Prófaði aftur í hádeginu og um það bil sem ég ætlaði að fara að slíta því samtali líka, svaraði allt í einu indælis kona í þjónustuverinu fyrir sunnan og tók skilaboð til þjónustufulltrúans míns hérna fyrir norðan Um sexleitið þegar ég var komin í enn eina vinnu, hringdi svo þjónustufulltrúinn minn lafmóð og gat sagt mér að kaupið okkar væri alveg á sínum stað, hún hefði bara óvart slegið inn eitt rangt reikningsnúmer og reddaði þessu svo bara í einum grænum hvelli Mér fannst vera svolítið hik í röddum bæði konunnar í þjónustuverinu og þjónustufulltrúans míns og gott ef ekki líka í röddinni á símsvaranum, þegar þau svöruðu símanum hjá mér, en hikið var löngu farið þegar í ljós kom að ég ætlaði ekkert að vera með neins konar læti, leiðindi eða vesen út af einhverju sem þetta góða fólk á akkúrat enga sök á Ég samþykki ekki hvernig komið er fram við afgreiðslufólkið í bönkunum, alls ekki ! Verum kurteis og komum vel fram, það voru alls ekki þau sem létu bankana rúlla ! Eigið góðan dag elskurnar mínar og munið: Bros og knús í öll hús, líka bankana

Smá sól auðvitað :-)

Það er smá sólarglæta úti og ég er að herða mig upp í að fara í Bónus eða bara einhverja svona verslun, mér er nokk sama hvað hún heitir Mér leiðist óhuggulega að versla en má til þegar hér er orðin sannkölluð þurrabúð... sérstaklega þegar ekki er til mjólk í kaffið mitt, þá er nú fokið í flest skjól og ég drattast þá út auðvitað, ekki má mig sjálfa nú vanta neitt... Dóttir mín elskuleg hringdi frá Gautaborg í morgun og var að hafa áhyggjur af því að mamman væri alveg blönk Fréttirnar sem þær heyra þarna úti benda til þess að allir íslendingar séu svangir og hafi hvorki í sig né á og ekki til ein einasta króna í neinu koti. Það er heldur ekki hægt að kaupa íslenskar krónur í sænskum bönkum þessa dagana, þær eru einfaldlega ekki á boðstólum Annars góð, fyrir utan það að vera að hrökkva upp af úr leti... Eigið góðan dag elskurnar mínar allar og munið brosin og knúsin  

Þá glotti ég nú ;-)

Þeir eru margir sérfræðingarnir sem hafa látið ljós sitt skína undanfarna daga í sambandi við ástandið í efnahagsmálunum hérna á litla sæta skerinu okkar Ég kom dauðóvart inn á viðtal við einn þeirra, veit ekkert hver hann er og þó ég hefði heyrt nafnið væri ég búin að gleyma því, en hann var spurður hvort þetta ástand mætti kannski rekja til óstjórnar og klúðurs í bönkunum ?  "Neineinei, alls ekki sko bankarnir voru mjög vel rekin fyrirtæki sko" ! Nú sagði spyrillinn, en af hverju eru þeir þá í þessari slæmu stöðu núna ? "Ja sko, þetta voru mjög vel rekin fyrirtæki, nema að því leiti að þeir höfðu bara eina veika hlið... þeir áttu á hættu að rúlla ef þetta kæmi fyrir sem er að koma fyrir núna"! Þvílík viska, þetta er eins og að eiga bát, mjög vel smíðaðan bát að öllu leiti... nema að það er gat á honum rétt ofan sjólínu. Það sleppur alveg á meðan það er logn og kyrrt í sjóinn, en ef það hvessir... ja, þá sekkur hann. Ég mundi ekki vilja eiga svoleiðis bát og mundi þar að auki aldrei reyna að halda því fram að hann væri góður bátur Annars góð bara Ég sem losaði mig við gistiheimilið af því að það var orðin allt of mikil vinna, er farin að vinna að meðaltali 14 tíma á dag og ekki spyrja mig af hverju... Ég ákvað í morgun þegar ég vaknaði, að nú þyrfti ég að fara að taka í hnakkadrambið á þessari konu hérna, sem er ég og endurskoða málin aðeins Ég þarf svo sannarlega ekkert að vinna svona, við erum ekki beinlínis með stórt heimili, höfum allt til alls og meira en það og svo hef ég ekki einu sinni tíma til að eyða kaupinu mínu Og það auðvitað gengur ekki Bros og knús í öll ykkar hús, elskurnar mínar allar

Knús og brosbylgjan :-)

Bloggvinir mínir og vonandi miklu fleiri, eru að senda á milli sín bros og knús í öll hús og eru  yndislega mikið á jákvæðu nótunum Og ekki veitir nú af þessa dagana og bara alla daga finnst mér nú. Ég ákvað að reyna að vera jákvæð í svo sem eins og einni færslu eða svo... svona til tilbreytingar frá allri neikvæðninni og vonleysinu sem hrjáir mig mjög áberandi alla daga... Ég er búin að raupa mikið um fréttabindindið mitt núna undanfarið, það er svona svolítið kerlingargrobb og mest til þess ætlað að láta alla halda að ég sé alger nagli sem ekkert bítur á En það er alveg hreina satt að ég hef ekki sest niður og horft á fréttir og ef ég hef lent á fréttum í útvarpinu í bílnum, þá skipti ég yfir á tónlist... en það eru bara svo margar fréttaveitur í kringum mig að ég missi auðvitað ekki af neinu Ég hef tilhneigingu til að fara að berjast, þegar eitthvað gengur ekki eins og það á að ganga, miðjubarnakomplex = alltaf að laga allt og fer of oft flikkflakk og heljarstökk af því að ég ætla að hafa allt í lagi allsstaðar En ég er nú farin að fatta það með árunum, að ég get alls ekki lagað allt og mín meðfædda hugarleti gerir mér það auðveldara en ella að sætta mig við það. Efnahagsástand íslenska þjóðarbúsins get ég til dæmis ekki lagað, ég veit ekki betur en ég sé með fólk á kaupi við það, svo ég er ekkert í þunglyndi út af því og velti mér sannarlega ekki upp úr því heldur Bros og knús í þitt hús og ég meina það Eigið góðan dag og munið að við höfum öll vel efni á brosum og knúsum  

Vaskinn/vaskurinn...

Hérna um daginn tókst mér með miklu harðfylgi og einhverskonar misheppnuðum húsmóðurtöktum, að stífla vaskinn í eldhúsinu... Aðferðin er einföld, hella bara soðinu af nýja slátrinu í vaskinn og fara svo fram og svara í símann og fara til dyra í einni og sömu ferðinni og gleyma algerlega að láta renna heitt vatn á eftir slátursoðsfitugumsinu... Áberandi mikil kreppa í toppstykkinu á mér þann daginn... Aðferðin við að losa fj... stífluna var ekki eins einföld, eitt góða ráðið sem ég fékk var að sprauta uppþvottalegi ofan í rörið og láta liggja í sólarhring... en nei takk, hérna megin er ekki nokkur einasta þolinmæði til að bíða í heilan sólahring með vaskinn fullan af ógeðslegu sulli, ég þarf að not´ann, oft á dag. Og þó það séu þrír aðrir vaskar í húsinu og allir á einni og sömu hæðinni, þá vil ég samt hafa þennan starfandi í mína þágu og ekkert röfl Ég rauk í hendingskasti milli vinna og keypti eitthvað stórhættulegt efni í appelsínugulum brúsa, mokaði öllu sullinu úr vaskinum og hellti svo öllu eitrinu úr brúsanum ofan í rörið svo langt sem það náði... Lét renna kalt vatn eftir X tíma á eftir eins og stóð í leiðbeiningunum, já ég las þær reyndar... en þar lét ég auðvitað gabba mig, það gerðist ekkert... Drullusokkurinn dugði ekkert heldur, svo ég gerði það eina sem hægt var að gera í þessari alvarlegu stöðu... beið þangað til spúsi minn kom heim, hann reif eða öllu heldur skrúfaði sundur rörin undir vaskinum og losaði auðvitað stífluna... Og boðskapurinn með þessari frásögn ? Akkúrat alls enginn... ég er bara að leyfa ykkur að skyggnast aðeins inn í eldhúsið mitt með mér Bíðið bara þangað til ég fer að birta uppskriftir hérna... ekki samt halda niðri í ykkur andanum á meðan þið bíðið... Eigið dásamlegan dag, öll sem eitt

Hræðslufræðsla.....

Allir fjölmiðlar landsins virðast hafa það sem vinnureglu númer 1, 2 og 3 að valda sem mestu fjaðrafoki, hræðslu og múgæsingu þessa dagana Ég er alveg hörð á fréttabindindinu mínu sem ég er búin að stunda grimmt síðustu dagana, en ég kemst auðvitað ekkert hjá því að reka augun og/ eða eyrun í einhverjar fréttir. Ég hitti fullt af fólki alla daga, svolítið snúið að vera í einhverskonar hittafólkbindindi í minni vinnu og það er auðvitað um fátt meira talað en efnahagsástandið á okkar, fyrir stuttu síðan ríka og hamingjusama landi. En vitið bara hvað, gamla fólkið glottir að okkur... Ein gamlan mín sem ég fór til í gærkvöldi tók skellihlægjandi á móti mér og sagði að nú væri liðið orðið endanlega vitlaust... það væri búið að klára upp allar birgðir bæjarins af sykri og hveiti Það er viðkvæðið hjá gamla fólkinu að það nennir ekkert að horfa á fréttirnar, skilur ekkert um hvað er verið að tala í sumum tilfellum en flestir glotta bara og segja að unga fólkið í dag viti ekkert hvað kreppa er Það vorkennir ekkert þeim sem áttu svo mikla peninga, að þeir gátu leikið sér með þá með því til dæmis að kaupa hlutabréf, þeir sem eiga ekki peninga þurfa ekkert að hafa áhyggjur af því að tapa þeim. Innilega sammála Það væri auðvitað kerlingagrobb í mér að halda því fram að ég hafi engar áhyggjur, auðvitað hef ég þær svona í laumi... smá... en ég geri ekkert gagn með því að velta mér upp úr því sem ég get ekki breytt Þess vegna ætla ég að fá mér aðeins meira kaffi og fara svo í fyrstu vinnu dagsins, með þá ósk með mér að þið eigið öll góðan dag og slakið aðeins á stressinu elsku krúttin mín

Jæja...

Góðan og blessaðan sunnudaginnHaustverkum lokið á þessu heimili, gekk alveg glimrandi vel með dyggri aðstoð spúsa míns, hann er jafnflinkur á öllum sviðum, eina vandamálið var að finna pláss fyrir allt slátrið og sviðin í frystunum... Það má vera löng kreppa án þess að við drepumst úr hungri á þessu heimili, kistan full, frystiskápurinn líka og svo er helmingurinn stóra ófríða ísskápsferlíkinu líka frystir og kemst ekki einu sinni ís handa barnabörnunum fyrir þar í viðbótSem er auðvitað ferlegt, þess vegna neyðist ég til að elda eitthvað af öllum þessum mat, til að búa til pláss fyrir þessa mjög svo nauðsynlegu neysluvöru barnabarnanna okkar. Setti tvo sláturkeppi í pott áðan, verðum auðvitað að smakka framleiðsluna, lyktin er allavega góðFékk tvær þessar frábæru vinkonur mínar í heimsókn í gær, það var auðvitað gaman eins og ég vissi að það yrði, takk fyrir komuna elskurnar mínar Í dag eru rólegheit, eins og alltaf að vísu, ég er ekkert að vinna þessa helgi en á morgun byrjar kvöldvinnuvika og þá er ég líka að vinna frá sjö á morgnana, enn sem komið erEn, það er ekki fyrr en á morgun og eina vitið er að njóta bara dagsins í dag eins og það komi enginn morgundagurEigið dásamlegan sunnudag

Oft var þörf, en er ekki núna nauðsyn bara ?

Í dag er dagur sláturgerðar á þessu heimili, geri að vísu eingöngu lifrarpylsu, ekki úr blóðinu. Það er alls ekki af neinum trúarlegum ástæðum samt, eingöngu bragðlaukatengt...Mér finnst blóðmör vond eða vondur eða vont... misjafnt í hvaða kyni fólk vill hafa þessa sláturafurð. Það er ekkert mál að gera slátur núorðið, mörinn kemur brytjaður, keppirnir saumaðir og hausarnir verkaðir... bara hakka lifrina, hræra gumsinu saman, setja í keppina og sauma fyrir þá... málið dauttÓdýr, góður og hollur matur og lítið fyrir þessu að hafa, svona á þetta að vera. Það er af sem áður var, þegar það tók mig minnst dag, að gera úr 10 slátrum og þá þurfti að byrja virkilega snemma og halda vel áfram, svo ég tali nú ekki um sóðaskapinn af öllu sullinu...Mér er sko alveg sama þó allur sá sóðaskapur fari fram einhversstaðar allt annarsstaðar en í mínu eldhúsi, það er nefnilega ég sem þarf að þrífa eftir svoleiðis og ekki nenni ég því nú meira en nauðsynlegt erDagurinn í gær var frábær, yndislegir gestir, góðar vinkonur og synir mínir, gjafir, knús og kveðjur og tveir af þremur uppáhaldsgæjunum í lífi mínu færðu mér blóm, spúsi minn og yngri sonurinnSvo fékk ég ótal símtöl líka, hún Linda litla sonardóttir hringdi til dæmis tvisvar frá Sviss bæði í gærmorgun og í gærkvöldi, hún saknar ömmu sinnar eftir mánaðardvöl í Langtíburtinstan og vill að ég komi og sæki þær, hana og mömmu hennarSvo veit ég að það koma líka tvær góðar vinkonur mínar í dagÉg vona að þið eigið öll dásamlegan dag og munið að vera góð við hvort annað, við höfum alltaf efni á því

Það fæddist stúlka...

... þessi líka fallega og yndislega litla dama, annað eins yndi hefur bara ekki sést, augasteinn foreldra sinna og allrar ættarinnar auðvitað og langt út fyrir hana Í dag er fimmtíu og eitt ár síðan og ekki hefur henni nú farið aftur, síður en svo... stækkað aðeins og svarti liturinn á hárinu sem entist bara í viku held ég, orðinn ljósskolgrálitaðeinhvernveginnóráðið... Ég á afmæl´í dag, ég á afmæl´í dag, ég á AAAFMÆÆÆÆLI ég sjáááálf, ég á afmæl´í dag Og auðvitað merkisafmæli af því að það er mitt afmæli og ég er sko ekki að heiman, ég verð sem sagt heima og það er opið hús eins og alltaf fyrir alla þá sem vilja hitta litla krúttið... Nú, mig auðvitað... Gjafir vinsamlegast afþakkaðar, en þeir sem vilja minnast mín eru vinsamlegast beðnir að leggja inn á söfnunarreikninginn minn, númer: símanúmerið mitt, tölvupóstfang og heimilisfang Kveðjur, heimsóknir, knús og kossar eru gjafirnar sem virkilega slá í gegn, en svo eiga auðvitað spúsi og börnin mín að kaupa eitthvað handa mér... og það eiga að vera annað hvort blóm eða nammi, nema hvorutveggja sé Mér datt samt alveg í hug í gærkvöldi þegar ég kom loksins heim klukkan langt gengin í 10 úr kvöldvinnunni, hvort gæti verið að ég væri að verða áttatíu og eins... en ég hef þá greinilega yngst um ein 40 ár við góðan nætursvefn Eigið góðan dag elskurnar mínar allar og verum góð við hvort annað, við höfum ekki efni á öðru