Rang-skynjaðar of-hugmyndir....

Sem betur fer þjáist ég ekki af ofskynjunum.... eða ranghugmyndum... held ég Ég er frekar jafnlynd og glaðleg í eðli mínu og á auðvelt með að umgangast fólk, ekkert grobb neitt, bara upptalning á staðreyndum ! Ég lít samt ekki á mig sem eitthvað kraftaverkameðal eða guðs gjöf til handa þeim sem þjást af depurð... það náttulega væru hreint ægilega ofskynjaðar ranghugmyndir ! Og neita líka að láta nota mig þannig. Það getur hreinlega gert út af við þá, sem þjást af þunglyndi og/eða depurð að þurfa að umgangast svona manneskju eins og mig, sem tek það mjög alvarlega að láta eins og fíbbl í vinnunni... Rétt rúmlega fertugur maður sem greindist með MS sjúkdóminn fyrir þrítugt, er mjög dapur þessa dagana.... lái honum hver sem vill. Það passar þá ekki að leggja áheyrslu á að reyna að peppa hann upp með alls konar hálfvitagangi og sögum af frísku fólki, sem getur allflest sem það langar að gera og kemst allra sinna ferða án hjólastóls... Mér finnst það nálgast mannvonsku að láta sér detta það í hug og ég tek ekki þátt í því...  Stundum vita blessaðir sérfræðingarnir ekkert utan bókanna... Ef þessi góði maður vill bara lesa blaðið á meðan ég er að  þrífa hjá honum, þá má hann það sko alveg ! Ég get ekkert sagt eða gert og neita að reyna það, til að fá hann sætta sig við að vera að lamast hægt og rólega, missa sjón og ýmislegt fleira sem við hin sem erum í frískari kantinum, teljum alltof sjálfsagt að hafa... Vildi samt óska þess að ég gæti sagt eða gert eitthvað sem að gagni mundi koma.... Þetta er meiriháttar náungi, var rétt að ljúka námi í iðn sem hann hafði áhuga á að stunda þegar hann greindist með þetta helvíti... Yfirleitt er ég ekki reið út í neitt eða neinn en ég get orðið örmagna af reiði í garð svona sjúkdóma... og í garð sumra sérfræðinga líka sem sjá bara sjúkdómstilfellið, en ekki manneskjuna sem þarf að burðast með sjúkdóminn... Æi eigið góðan dag elskurnar mínar allar og munið aðgát í nærveru sálar  

Flykkið.....

Ísskápurinn nýi kom í hús í gær.... Þetta er 100 kílóa flykki og það þurfti 4 menn til að koma honum  af kerrunni og inn í húsið, þegar það var búið að taka útihurðina og forstofuhurðina af hjörunum Þakka ykkur fyrir hjálpina yndislegu herramenn Ég hafði vit á að vera alls ekkert að flækjast fyrir á meðan á þessu stóð, var að vísu í vinnunni og þegar ég skrapp heim um 7 leitið var allt saman yfirstaðið. Þeir tóku líka yfir hundrað kílóa þungan pottofn sem lá hérna á lóðinni og hentu honum, hann kom í ljós undan snjónum þegar fór að vora, við keyptum sko lóðina óséða Núna standa þessi 100 kíló af ísskáp inni í eldhúsi og mikið svakalega er hann ljótur Um ellefu leitið í gærkvöldi var hann samt aðeins farinn að skána í útliti, að vísu farið að skyggja þá og engin ljós komin í eldhúsið ennþá Hann venst, hann verður að gera það, hann er sko kominn til að vera. Hann er á hjólum, sem mér hefur alltaf fundist öll stærri heimilistæki ættu að vera, þannig að ég gæti hæglega trillað með hann út um allt hús... vonandi langar mig samt aldrei til þess... þá þyrfti nefnilega að fara að kalla til mennina í hvítu sloppunum  Núna eru bara 15 dagar þangað til við förum til hennar Kötu minnar í Gautaborg og ég hlakka svakalega mikið til Njótið dagsins og farið vel með ykkur og helst alla aðra líka

Dásamlega brjálað bara :-)

Það var dásamlega brjálað að gera hjá okkur í gær... Við kláruðum að setja saman tvo háa skápa og í annan settum við bakaraofninn og örbylgjuofninn og hurð og á hinn, ryksugukústaskápinn, settum við hurðirnar. Hljómar ferlega einfalt og auðvelt að skrifa það, en við kláruðum þetta klukkan ellefu í gærkvöldi, eftir þó nokkur heilabrot, fimleikasýningu, sko við vorum ekkert að sýna fimleika, það voru barnabörnin og frábæran gestagang. Hafði ekki einu sinni tíma til að kíkja á bloggið eða öfunda Birnu systir neitt að ráði af því að vera í Svíþjóð hjá Ernu systir Þá eru bekkplatan, (þarf að panta hana) og efri skáparnir, (setja þá saman og dúndra þeim upp), næsta mál á dagskrá. Ég er með það á hreinu að fyrst okkur tókst svona vel með ofnadótið, þá er eftirleikurinn minnsta málið í öllum heiminum ! Ég kveið svo fyrir því að fara að setja það allt upp að það var "farið að hafa áhrif á lífsgæði mín" ! Æi nei nei, þetta er bara svo flott orðalag að mig langaði að nota það, en þetta var alls ekki svo slæmt Í dag byrjar kvöldvinnuvikan hjá mér og hún er sú síðasta sem ég vinn, þangað til einhvertímann í ágúst, held ég bara. Byrja 2 vikna sumarfrí 2. júní, strax í veikindafrí eftir það og að því loknu klára ég hinar 4 vikurnar, sem eru eftir af sumarfríinu Já ég er alvarlega ástfangin af sumarfríinu mínu og ekki skemmir það að spúsi minn tekur núna sumarfrí í fyrsta skipti í 7 ár, eins og ég ! Eigið dásamlegan dag og ennþá dásamlegri vinnuviku, ég ætla núna að hringja og eyðileggja vinnuvikuna fyrir manni sem klúðraði smá í eldhúsinnréttingunni okkar Njótið dagsins elskurnar mínar allar

Það bregst ekki....

.... að ef ég hengi út á snúru, þá fer oftast að rigna ! Þegar við bjuggum í fjallinu var þetta líka svona og fólkið í hinu húsinu reif alltaf inn þvottinn sinn um leið og ég hengdi minn útÞað er eins og ég finni á mér að það sé að fara að rigna, heilinn snýr skilaboðunum við og útkoman er sú að ég hendist út á snúru með þvott... til að láta hann þorna... í vætunniMér hefur stundum dottið í hug að hengja bara óhreina þvottinn út, strá yfir hann sápu og bíða svo bara á meðan það skolast úr honum...Mér dettur nú líka svo mörg heimskan í hug... Það er sem sé rigning hérna og ég er búin að kaupa útihitamælinn langþráða, hann liggur á borðstofuborðinu og það er 19 stiga hiti... hérna inniÞað gerðist ótalmargt hérna inni í 19 stiga hitanum í gær, við festum alla neðri skápana, búið að græja vaskaskápinn, loka óvirkum tenglum, tengja nýja og ég veit ekki hvað og hvað ! Svo föttuðum við að hliðar á skápum sem snúa ekki að vegg, eiga ekki að vera bara hvítar svo við verðum að taka annan stóra skápinn í sundur aftur og setja litaða hlið í hannSem betur fer er hann ennþá laus frá ! Svo föttuðum við líka að eyjan, sem er bara 2 skápar sem standa úti á miðju gólfi, á að vera með lituðum hliðum og baki, en það fylgir bara alls ekkert með til að gera hana þannigSko... ef ég væri ekki alveg svona þolinmóð í eðli mínu.....Það er alls ekkert hægt að setja út á gæði vörunnar, en mér dettur í hug að sá/þeir sem tók/u til pöntunina hafi kannski bara verið að hugsa um eitthvað allt annað.... í vinnunni sinni, við erum með slatta af dóti sem við höfum ekkert með að gera, en vantar svo ýmislegt sem við þurfum að nota. En núna á eftir tökum við okkur smá pásu frá eldhúsinu og förum á fimleikasýningu, þar sem meðal annarra þrjú barnabörn okkar ætla að sýna snilli sína Njótið lífsins á þessum sæla sunnudegi og kíkið inn á vinsældarlistann hans Gunnars hérna hægra megin á síðunni minni

Góðan og blessaðan daginn !

Í fréttum héðan er það helst, að Rafvirki Tengdasonur kom seinnipartinn í gær og gerði skurk í rafmagninu í eldhúsinu. Þó ég ætti lífið að leysa gæti ég ekki með nokkru móti lýst því hvað hann gerði skýrt og skilmerkilega, en hann dró út víra hér og tengdi aðra þar, boraði göt og lagði rafmagnsrör, setti ljós í loftið og dósir í veggi og einhvernvegin var allt svo bara tilbúið..... Kötturinn okkar hann Lúkas, (til að forðast misskilning, það eru 5 ár síðan hann fékk nafnið)er farinn að kunna vel við sig... á sólpallinum á næsta húsi norðan við Þaðan sér hann mig ef ég kem fram í þvottahús og að hans áliti þá er engin önnur ástæða fyrir heimsóknum mínum þangað en sú, að setja mat í skálina hans. Til að láta honum líða sem best hérna á glænýju heimili kaupi ég handa honum dósamat..... Kattarskömmin beitir mig andlegu ofbeldi, það passar alltaf að ef það er bara þurrmatur í skálinni hans lengur en honum líkar, þá sést hann ekki alla nóttina og ég held auðvitað að hann sé lagstur út og það finnst mér hræðileg tilhugsun..... Þá fer ég og kaupi dósir og eins og við manninn mælt, um leið og ég kem heim með pokann þá kemur hann skokkandi Í dag, þennan ljúfa laugardag, byrjum við að stilla fæturna undir skápunum og festa þá við veggina og dúndra upp efri skápum líka.... allt að gerast núna Systursonur minn hann Axel Árni Hjelm í Lynköping í Svíþjóð verður fermdur í dag ! Til hamingju Axel ! Njótið dagsins elskurnar mínar, eins og kostur er

Þessi gula skæra birta.....

.... á himninum held ég að sé blessuð sólin, jú ég er nokkuð viss... hún skín í þessum skrifuðu orðum hérna á kaldan norðurhjarann. Það er nú ekki oft sem hún hefur heiðrað okkur hérna með nærveru sinni undanfarið, en bara æðislegt.... er á meðan er Hún hefði nú reyndar mátt sína sig aðeins, síðustu tvo daga, það er nefnilega búið að vera kalt bæði úti og inni. Við vorum að tengja ofninn í eldhúsinu og til þess þurftum við að taka heita vatnið af öllum hinum ofnunum, kláruðum í gærkvöldi og settum hitann á húsið aftur. Píparinn hvað ? Gefum honum bara frí Núna bíðum við bara eftir Rafvirkja Tengdasyni og svo getum við farið að klára að setja saman skápana sem eftir eru og festa þá á veggina, setja tilheyrandi eldhústæki inn í þar til gerða skápa og svo eru eftir svona smáatriði eins og hurðir á skápa og skúffur í skápa og sökkull, bara dund Í gær komu menn og gerðu gatið út, fyrir háfinn snöggir að og snyrtilegir, þá er það tilbúið. Ég er í fríi um helgina og á bara eftir að vinna 10 virka daga, þá er ég komin í Sumarfrí 101  Sumarfrí 102 verður ákveðið seinna í sumar  eða þegar ég er búin að fara í Veikindafrí 101 frá 20. júní. Núna fer ég og hengi út á snúru, bara svona svo nágrannarnir haldi að ég sé fyrirmyndarhúsmóðir.... ekki til að nota þurrkinn Njótið dagsins og ... já bara njótið dagsins  

Eldhús er ekki eldhús....

.... nema þar sé uppþvottavél ! Ég stend og fell með þessari fullyrðingu minni Það er alveg á mörkunum að ég láti það skipta máli hvort þar er eldavél, mér leiðist nefnilega að elda þó ég sé fantakokkur. Þó að eldhúsið okkar sé ekki tilbúið nema að hálfu leiti, er uppþvottavélin samt farin að vinna verkin sín... eða mín. Og af því að hún er ætluð inn í innréttinguna undir bekkplötuna og á eftir að setja á hana framhlið í stíl við aðrar hurðir eldhússins, sem gefur henni eðlilegt jafnvægi á gólfinu, þá þurftum við að fergja hana svo hún dytti ekki fram fyrir sig í vinnunni. Henni er alveg sama og mér líka Ég hringdi í píparann í gær, þennan þarna sem var búinn að bjóðast til þess að skjótast strax í að tengja ofninn um leið og ég hringdi, en við höfum greinilega ekki sömu skoðun á því hvað orðið "strax" þýðir. Ég skal alveg teygja það upp í 2-3 daga, en hann vill meina að 2-3 vikur sé rétt þýðing á orðinu "strax". Ég gerði tilraun á honum með orðið "núna" en það var sama svarið, það þýðir líka 2-3 vikur í hans orðabók. He he, það er sko ekki séns í helv... að við förum að bíða eftir því í einhverjar vikur að láta tengja einn ofnskratta, svo við fórum og keyptum allt til þess og gerum þetta bara sjálf. Það er að segja, spúsi minn vinnur verkið en ég er verkstjórinn og hans faglegi ráðgjafi í tengjasjálfofninnokkardæminu... lesist: handlangari Hann gekk frá öllum lögnum í kjallaranum í gær með minni faglegu aðstoð og í dag verður sjálfur ofninn tengdur við það alltsaman. Enda er kalt hérna á norðurhjaranum núna, svo það er ekkert notalegt að hafa allt of lengi skrúfað fyrir alla ofna í húsinu ! Njótið dagsins og Birna mín, það er kominn fimmtudagur, góða ferð og góða skemmtun

Haldiði það ekki....

Veit alveg að ég er frekar illa upplýst um vanda þjóðarbúsins og stöðu gjaldeyrisjöfnunarsjóðs og svo framvegis..... Ég þarf líka ekki að vita mikið um það, vegna þess að ég get ekkert lagfært það... Sjálfhverfan í sinni verstu mynd... Aðal ástæðan fyrir því að ég er svona illa upplýst er að ég horfi helst ekki á fréttir þessa dagana... Ég bara get það ekki... Þúsundir fastir undir rústum húsa í Kína, með myndum... tugþúsundir drukknaðir í Burma, með myndum... feður nauðga börnum sínum, með mjög óvelkomnum myndum í huganum... svo eitthvað sé nefnt. Allskonar hryllingur og skelfilegar hamfarir í 4 fréttum af hverjum 5 og ég gefst upp á að horfa, hlusta og lesa... Samt bara tímabundið, ég fer að reyna að fylgjast með aftur, af því að ég er alltaf að bíða eftir því góða líka... Til þess að reyna aðeins að hryllingsjafna þetta allt, horfi ég ennþá betur í kringum mig í mínu nánasta umhverfi og reyni eins og ég get, sjálfsagt af sorglega takmörkuðu hugmyndaflugi þó, að sjá allt gott og gleðilegt í öllum hornum, hversu smátt sem það er og reyna eitthvað til að gleðja einhvern, þó ekki sé nema brosa.... Mér tókst þó að gera þrennt gott í gær sem ég er búin að reyna lengi, fyrir skjólstæðinga í vinnunni minni. Það hljómar eflaust frekar hrokafullt þegar ég held því fram að stundum þýðir ekkert annað en að tala beint við yfirmenn, ekki lægra setta... en mér er sama, ég  nota bara þau meðul sem virka Sólin er langt komin að hrekja burt þokuna, sem lá hérna yfir öllu í morgun og uppþvottavélin mín nýja þvoði heilan helling af leirtaui fyrir mig í gærkvöldi. Og ég fékk alveg lygilega mikið hól í starfsmannaviðtalinu í gær.... grobba mig kannski af því þegar ég er búin að njóta þess aðeins lengur, með sjálfri mér ! Gangið bjartsýn inn í góðan dag og líði ykkur öllum eins vel og hægt er 

Starfsmannaviðtalið ógurlega...

Á tíu árum í þessari sömu vinnu minni, hef ég farið í alls tvö starfsmannaviðtöl, man lítið eftir því fyrra, en minnir að ég hafi þurft að fylla út einhver blöð... Það seinna var ekki alveg hefðbundið og stóð ekkert til, hitti þáverandi yfir-yfirmanninn/konuna, af tilviljun fyrir utan skrifstofuna hennar og við settumst á grasbala í sól og spjölluðum smástund. Hún spurði mig hvort ég ætlaði að fara að hætta í þessari vinnu, ég svaraði að ég vissi ekki til þess, hún spurði þá hvort mér væri ekki sama þó þetta teldist bara starfsmannaviðtal og ég svaraði að það væri örugglega fínt, svo var þetta eiginlega bara búið Nú er ég að fara í starfsmannaviðtal hjá nýjum yfir-yfirmanni/konu og það er búið að hrekkja mig með því að líklega taki það 2-3 tíma Virðist eftir fréttum að dæma vera spurt um allt milli himins og jarðar, nema það sem skiptir mestu máli að mínu mati, það er að segja mig og hvernig mér líður í vinnunni og hvort ég vilji ekki fá kauphækkun ! Æi þetta þarna síðasta veit ég að vísu ekki hvort stendur nokkuð í reglunum um svona viðtöl.... en það má alltaf breyta reglum er það ekki ? Annars hef ég engar áhyggjur af þessu, nýi yfir-yfirmaðurinn/konan er ágæt, mér líkar vel við hana og mér er sama þó garnirnar séu raktar úr mér, upp að vissu marki... sem sagt þangað til ég segi stopp og ég kann alveg að segja stopp Við settum saman skúffur í gær í tryllingi, (bara skúffur í neðri skápum í mínu eldhúsi), þegar við vorum búin að skella saman öllum skápum sem við gátum grafið upp, hér og þar um húsið. Teikningin passar ekki alveg inn í eldhúsið, þannig að við verðum að skila þremur 60 cm breiðum skápum og fá í staðinn tvo 80 cm breiða eða færa bara útveggina um set.... nei skila Það er " farameðrusldagur" í þessu húsi í dag, fermetrarnir sem við höfum til að ganga á eru ekki svo margir enn sem komið er, svo það munar um allt sem fer út úr húsinu Njótið þessa magnaða mánudags og gangi ykkur vel í nýrri vinnuviku

Gott fyrir gróðurinn !

Það rignir hérna núna og virðist vera tiltölulega hlýtt, þó engin hitamet sem ég veit um, hafi verið slegin það sem af er dagsins, sem er að vísu kannski ekki alveg byrjaður að margra mati... Ég veit, ég veit... "hvað ertu að gera svona snemma á fætur og það er frí"Hef heyrt þennan söng svooo oft, en eina svarið sem ég hef við því, er að ég er með þeim ósköpum gerð að vakna bara þegar ég er búin að sofaOg get einhvernvegin ekki sætt mig við að einhver pínulítill raf- eða rafhlöðuknúinn tímamælir fái að stjórna því hvort og þá hvenær ég fer að fæturVakna, opna augun, líta á klukkuna, sjá að hún er bara 6, loka augunum og halda áfram að sofa... Get þetta ekki, mér er nefnilega alveg slétt sama hvað klukkan er, ef ég þarf ekki að mæta einhversstaðar Við kláruðum í gær að setja saman þá neðri skápa í eldhúsinu okkar, sem voru rétt afgreiddir..... Í stuttu máli þurfum við á morgun, að skila  tveimur 60 cm breiðum skápum og fá tvo 80 cm breiða í staðinn. En það er ekkert vandamál, bara verkefni til að leysa. En það er verra með uppþvottavélina nýju..... Við vorum hrikalega góð með okkur í gær og drösluðum henni fram og tengdum hana við vatn og rafmagn og mikið var ég nú farin að hlakka til að hún færi að vaska upp í staðinn fyrir mig. En... við getum ekki opnað hana og leiðbeiningarnar sem fylgja, eru inni í henniTil þess að geta opnað hana, verðum við að lesa leiðbeiningarnar, en til að lesa leiðbeiningarnar, verðum við að opna hana..... ekta MunkhausenÉg óska ykkur öllum góðs dags og vona að þið njótið frísins, en þið sem eruð að vinna: Gangi ykkur vel