Var að setja inn nýjar myndir....

.... af nýjustu afrekum okkar vitleysinganna hérna á hælinu Það er ekki einleikið hvað þetta er gaman og mikið hrikalega er erfitt að finna skynsemina, innan um allt draslið hérna og hætta tímanlega á kvöldin ! Bara svona rétt til þess að ganga ekki svo fram af okkur, að við höfum fyrir rest ekki heilsu til að njóta allra dásemdanna þegar þetta allt er búið Svo er líka til líf fyrir utan eldhúsið okkar..... nú er það ? Ég gef mér varla tíma til að kíkja á bloggið og það náttulega gengur ekki Við erum komin með marmarakorkinn á gólfið og einhvernvegin tókst okkur að setja saman einn skáp í gærkvöldi, hornskáp með snúningsgrindum... Nei það er ekkert mál, ef maður er bara ekki að grauta í öllu í einu Af því að ég er ekki ennþá komin með útihitamæli, þá get ég ekkert sagt til um hversu heitt/kalt er úti en ég get þó upplýst, að það snjóar ekki ! Það var ferlega fúlt, svo ekki sé nú meira sagt, að sjá í gærmorgun, blómstrandi páskaliljur hengjandi haus með snjóhúfur ! Ég ætla að nota tækifærið fyrst ég er nú í beinni útsendingu og senda kveðjur til fólksins okkar út um allt: Á Ólafsfirði, Svíþjóð, Vopnafirði, Danmörku, Keflavík, Orlando, Reyðarfirði, Sviss, Reykjavík, Grenivík og Akureyri og á öllum hinum stöðunum sem ég man ekki alveg í augnablikinu. Við erum ekkert búin að gleyma ykkur, erum bara föst í eldhúsalgleymi, en það lagast og sumarfríið okkar fer í að flækjast á flestalla þessa staði Svo segi ég gleðilega hátíð (segir maður það ekki í dag annars ?)og allar mæður: Til hamingju með daginn Njótið dagsins og lifum lífinu lifandi

Það haustaði snemma....

... þetta vorið, eins og einhver snillingurinn sagði Hér er allt hvítt af snjó og ættingjar mínir keppast við að senda mér fréttir af 25 stiga hita og sól á sínum heimaslóðum Þau búa sko alls ekki á Íslandi hvað þá Akureyri, ef það skyldi þurfa að taka það fram eitthvað sérstaklega... Og ein vinkona mín er svo í Orlando svona rétt aðeins til að toppa það, vona samt að hún sé að skemmta sér hryllilega vel Annars fá nú veðurguðirnir prik dagsins frá mér, fyrir að sjá til þess að ég þurfi ekkert að freistast til að vera úti.... Ekki það að mig langi mikið til þess, í dag erum við nefnilega að fara að leggja gólfefnið á eldhúsgólfið og það er betra að vera bara inni við það Við klárum það í dag og þá er næsta verkefni að fara að púsla saman eldhúsinnréttingunni !!! Mér finnst gaman að púsla og á nokkur 2000 kubba púsluspil, en mér sýnist innréttingin telji töluvert fleiri "kubba" en það Það verður bara gaman og hefur eiginlega verið "gulrótin fyrir asnann" í öllu þessu brasi, þegar kæmi að því að setja þetta saman, snyrtilegt, ryklaust og fjölbreytt verkefni sem við ætlum virkilega að njóta að dunda okkur við Við sjáum fram á það að við verðum komin með æðislegt, nýtt eldhús áður en maímánuður er liðinn og kannski bara áður en sumarið kemur hérna á norðurhjaranum ! Annars bara ljúfur laugardagur, vona að þið notið hann vel

Hér eru prik, um prik, frá prikum.....

Eitt af prikum dagsins fær hann sem fann upp verkjatöflurnar og annað fær svo hún sem fann upp hurðirnar ! Kyngreiningin í þessu er alveg rökrétt og verið ekkert að reyna að fá mig ofan af því.... Karlmenn eru veikara kynið og þess vegna er rökrétt að þeir hafi fundið upp verkjatöflur Ég hef engan karlmann hitt enn sem komið er, sem er eins hrifinn af uppfinningunni "hurðir", eins og ég og ég er kona, svo það telst rökrétt að kona hafi fundið upp hurðirnar Verkjatöflurnar koma sér einstaklega vel þessa dagana, svo ég geti haldið áfram að þræla mér út bæði í vinnunum og nýja eldhúsinu okkar og verið sæmilega geðgóð á meðan. Hurðirnar koma sér svo sérlega vel um þessar mundir, vegna þess að ef ég loka herbergjunum hérna, með áðurnefndum hurðum, þá þarf ég ekki sífellt að vera að horfa á draslið sem er þar inni ! Miklu skemmtilegra útsýni þannig skal ég segja ykkur og aftur, ég get verið sæmilega geðgóð á meðan  Helgarnar eru líka alveg ferlega flott uppfinning, sérstaklega þessar þriggja daga. Fyrir æðilöngu að mér finnst, voru þær eftirsóttar á þessu heimili til hvíldar eftir vinnuvikuna, núna eru þær svo vinsælar hér á bæ vegna þess að þá getum við unnið meira við að byggja upp eldhúsið og fáum frið fyrir vinnunum okkar á meðan. Að vísu er ég að vinna kvöldvinnu þessa viku, fram á sunnudagskvöld en á mánudaginn næsta gerist sá fáheyrði atburður, að ég á alveg frí allan daginn ! Ég er nú ekki búin að ákveða hvað ég geri við allt þetta frí.... sénsinn, hvað annað en eldhús Líði ykkur sem best í allan dag og verið dugleg að hæla öðrum... líka mér

Tuttugu og sex....

...dagar þangað til ég fer til Gautaborgar Hún dóttir mín þessi yndislegi ofurheili er að útskrifast þar úr háskóla með 30ogeitthvaðstafalöngunafni, sem félagsráðgjafi. Á sænsku heitir félagsráðgjafi eitthvað sem ég ræð ekkert við að reyna að segja, hvað þá skrifa.... En hún stendur sig alveg skuggalega vel eins og alltaf í skólum og hún hefur þær gáfur ekkert frá mér, ég er sko ennþá með allar mínar Þegar hún sótti um að komast inn í þetta nám þarna úti, voru bara 100 sem komust að, af mörg hundruð umsækjendum og hún var með 30 fyrstu. Er ég nokkuð montin af stelpunni minni ? Ó jú, heldur betur og hef alltaf verið, þó það sé alls ekki mér að þakka hvað hún er dugleg og vel gefin Það eina sem ég þurfti að hafa áhyggjur af í gegnum alla hennar skólagöngu hérna heima, var að hún þurfti bara alls ekkert að hafa fyrir náminu, en var alltaf með hæstu einkunnir. Undarlegt áhyggjuefni, veit það ! En svona var ég líka í skóla, þurfti ekkert að hafa fyrir þessu og missti þá bara áhugann, þetta var alltof auðvelt einhvernvegin, en hún datt sko ekkert í þann pytt þessi elska Í skólanum á Grenivík þar sem hún var allan grunnskólann, mátti auðvitað ekkert vera með tyggjó, en hún sleppti því ekki einn einasta dag held ég. Skólastjórinn alveg meiriháttar náungi var umsjónarkennarinn hennar í efri bekkjunum og á einum foreldrafundinum talaði hann um þessa tyggjóáráttu hennar. Ég sagðist skyldu reyna að tala við hana um það, en hann bað mig að gera það bara alls ekki, hún væri nefnilega næstum því of fullkomin í öllu.... náminu, umgengni, skapinu, mætingum, hegðun, hjálpsemi við aðra nemendur og svona taldi hann og taldi upp... Og klykkti út með því, að hann vildi að hún kæmi með tyggjó í skólann, en hann mundi samt halda áfram að láta hana henda því Mér hefur aldrei dottið í hug, að þakka mér það hvað börnin mín eru dugleg og yndisleg, en stundum flögrar að mér að eitthvað hafi ég þá kannski gert gott og rétt í lífinu, fyrst að ég er svo heppin að akkúrat þessi börn eru börnin mín Njótið dagsins og mitt prik í dag fá allir kennarar, það er starf sem ég mundi aldrei í lífinu treysta mér í

Fimleikar !

Aldrei hef ég nú verið verðlaunuð fyrir neina sérstaka fimi í neinu, nema kannski þegar ég sjálf annað slagið, verðlauna mig sjálfa fyrir fimi við að komast hjá óþægindum og erfiðleikum í lífinu   En núna reynir á fimina skal ég bara segja ykkur.... gólfin hérna eru eins og í mjög illa skipulagðri vöruskemmu, svo hæfileikar í fimleikum væru töluvert vel þegnir Ég væri líklega búin að reka vöruskemmustarfsmanninn ef ég væri verkstjórinn ! En starfsmaðurinn er ég sjálf svo ég held auðvitað vinnunni af því að ég er verkstjórinn... en ekki lengi úr þessu samt ef þetta fer ekki að lagast Gólfefnið kom í hús í gær og er í hrúgu á stofugólfinu og helmingurinn af innréttingunni kom líka í gær og þekur gólfið í holinu og teygir sig inn í borðstofu, kassinn með eldhúsháfnum er hálfur fyrir svefnherbergishurðinni og núna fyrst dettur mér í hug að það geti verið góð hugmynd að ryksuga ! En það má segja mér til málsbóta, að ég ætla þó að ryksuga áður en afgangurinn af innréttingunni kemur, sem verður líklega seinna í dag. Hef svolítið verið að velta því fyrir mér hvort það geti verið að einhverjum hjá flutningafyrirtækinu sé eitthvað illa við mig... Fyrst týna þeir háfnum mínum, svo skilja þeir hálfa innréttinguna eftir fyrir sunnan og reyna svo að rukka mig fyrir heimkeyrslu á gólfefninu, sem spúsi minn sótti sjálfur á bíl með kerru. En ég sé svo auðvitað að það bara getur ekki verið að einhverjum sé illa við mig En ef nú svo ólíklega vildi til, þá væri mér samt nokkurnveginn slétt sama, má nefnilega ekkert vera að því að velta mér upp úr því  Ég óska ykkur öllum dásamlegs dags, við leik og störf og prik dagsins fær uppáhalds flutningafyrirtækið mitt

Ef það skyldi nú hafa farið fram hjá einhverjum....

... þá vorum við að kaupa æðislegt 58 ára gamalt hús fyrir mánuði síðan Byrjuðum á því að leggjast í flensu í 10 daga samtals strax eftir að við fluttum, ferlega sniðug tímasetning En við komumst lifandi frá flensunni og fórum að rífa allt út úr eldhúsinu og þá meina ég allt ! Innréttingin fór í annað hús, gamla parketgólfið fór í ruslagám og á eftir fylgdi slatti af gamla steingólfinu sem var þar undir, líka í ruslagám. Svo fór svakaleg vinna í að ná gamalli hraunmálningu af veggjunum, það er nú meira ógeðið. En, nú erum við búin að rétta gólfið, Rafvirki Tengdasonur búinn að koma fyrir öllum dósum í lofti og veggjum og í gærkvöldi kláruðum við að klæða loftið Ef mér endist ævin í þetta, þá ætla ég að byrja að sparsla og mála veggina í dag og hringja í píparann svo hann geti fengið að breyta lögnum fyrir ofninn, sem honum finnst alls ekkert eiga að vera í eldhúsinu. Gólfhiti, bara gólfhiti og ekkert nema gólfhiti segir hann ! En þá hefðum við þurft að hækka gólfið töluvert, en við vorum að reyna að lækka það og það tókst með ágætum Eldhúsháfurinn sem við vorum búin að kaupa, þessi sem er búinn að vera týndur í 3 vikur, mætti allt í einu á tröppunum hjá okkur í gær og ég sá ekki betur en hann væri feginn að vera loksins kominn heim Vona að þið hafið það hrikalega gott í dag, eftir því sem ég best veit lifum við bara einu sinni og um að gera að reyna þá að njóta þess núna  Blessi ykkur, farin í Húskó

Eigingirni og sjálfselska....

... er eitthvað sem mér virðist lífsins ómögulegt að losa mig við.....Til þess að mér sjálfri líði ekki illa, kem ég mér hjá því með öllum mögulegum ráðum að leyfa mér að festa hugann við það, sem er ljótt og vont og ógeðslegt í veröldinni.... Eins og helvítis karlógeðið í Austurríki.... ætla ekkert að segja meira um hann, það vita allir hvern ég er að meina eða allt fólkið sem árum saman grunaði alveg að eitthvað hræðilegt væri að gerast í húsinu hans, en gerði ekkert í því..... Hvorugt skil ég eða vil reyna að skilja... mér liði svo hryllilega með því ef ég reyndi að setja mig inn í það, að ég einfaldlega reyni að sleppa því. Enda mundi ég ekki gera neinum neitt gagn með því heldur..... Mér finnst samt algert afskiptaleysi hræðilegt og ómannúðlegt á köflum.... Ég vil frekar skipta mér af og fá fullvissu um að allt sé í lagi, frekar en að gera ekkert, segja ekkert og fá svo að vita seinna að það var alls ekkert í lagi.... og hafa það svo bara á samviskunni að hafa ekki gripið inní...Ok ég hef ekki alltaf verið neitt voðalega vinsæl, þegar ég hef tekið mig til og troðið nefinu þangað sem það átti ekkert að vera, en það verður bara að hafa það. Þetta hljómar skuggalega líkt því að ég liggi á gluggum hjá fólki og sé með nefið niðri í hvers manns koppi, en það er ekki þannig, langt þarna á milli meira að segja. En kannski eins og í svo ótalmörgu öðru, engin skörp skil... En bara til þess að mér líði vel með sjálfri mér, þá hef ég frekar gripið inn í.... og í 90% tilfella var ástæða til... því miður. En það er ekkert sem ég segi frá hér, ekki fyrr en eftir ca 200 ár, en þá verðið þið kannski hætt að nenna að lesa bullið mitt.... En, sólin skín og það besta sem við getum gert í bili, er að njóta hennar og vera góð við okkur sjálf og flesta aðra

Ryk......

Loksins þegar við fórum nú að sjá eitthvað út úr augunum fyrir snjókomu hérna á norðurhjaranum, sem var eiginlega fyrst undir hádegi í gær, fór ég í göngutúr um lóðina okkar. Við eigum fjögur stór tré og ég meina sko risastór og þau eru að lifna, komið glænýtt brum á þau öll Það finnst mér alveg stórkostlegt, ég var að verða úrkula vonar..... Ég ætla ekkert að fara að auglýsa fávisku mína með því að reyna að segja neinum hvaða tegundir af trjám þetta eru, ekki strax, en svo mikið veit ég þó að tvö eru barrtré og tvö lauftré. Ég sá ekki betur en það væri snjókoma úti áðan, en skoðaði svo gleraugun mín og sá að þau voru bara svona rykug Við erum að vinna í að setja upp í loftið í eldhúsinu, Rafvirki Tengdasonur kom í gær og setti ótal göt á gamla loftið, dró úr hér, dró í þar, skellti upp dósum þar sem við átti og kom fyrir rörum á réttum stöðum. Það er ævintýralegt að horfa á hann vinna, hann er eins og stormsveipurinn í fyrstu Ajaxauglýsingunni Svo komum við í humátt á eftir honum með nýja klæðningu, að vísu ekki alveg eins og stormsveipur, meira kannski eins og gola Þetta er bara gaman, þó svo að allt sé í ryki hérna í húsinu hvort sem er inni í skápum, ofan í kössum eða bara inni í hausnum á mér. Það styttist í sumarfríið mitt og Gautaborgarferðina Ég tek frí fyrstu tvær vikurnar í júní, fer svo í smáaðgerð 20. júní og eitthvað veikindafrí á eftir og tek svo restina af af fríinu eftir það, plús svo það sem ég á víst inni frá því í fyrra Njótið þessa sæla sunnudags, ég ætla að halda áfram að setja upp loftaplötur

Það snjóar, en ekki samt eldhúsháfum....;-)

Líklega fer ég fljótlega að hætta að taka mark á veðurfræðingum.... Í dag átti nefnilega að vera vor, eiginlega bara næstum því sumar með 8 stiga hita og engri úrkomu hérna á norðurhjara. En þar sem ég sit og skrifa þetta, snjóar úti og það bara töluvert þétt.... Ok þetta er svolítið líkara slyddu en snjókomu, en engu að síður í snjólíki ! Annars ætlaði ég svo sem ekkert að vera úti að grilla eða í sólbaði eða neitt svoleiðis, það á allt að gerast í eldhúsinu okkar í dag, en mér finnst bara alveg kominn tími á gott veður ! Rafvirki Tengdasonur mætir hér galvaskur eins og hans er von og vísa klukkan 8 og skurkar af rafmagnslagningunum eða hvað það er kallað Ég hringdi út um víðan völl í gær og pantaði gólfefnið, rak á eftir innréttingunni og heimtaði nýjan háf fyrir þann sem "týndist í hafi". Eina krafan sem ég geri til fyrirtækja sem sérhæfa sig í að flytja vörur til fólks, er að þeir flytji þá vörurnar til fólksins og ekkert múður. "Ja það getur nú alltaf komið fyrir að pakkar fari sko bara forgörðum" var svar sem ég fékk þegar ég var að spyrjast fyrir um eldhúsháfinn minn. Þetta er nú enginn smápakki sem ég er að grennslast fyrir um.... varla líklegt að hann hafi lent bak við stól og enginn finni hann eða hann sé alveg innst inni í hillunni og enginn sjái hann ! "Nú ertu að tala um eldhúsháf ?" Eh já, það var nú upphafið að samtalinu okkar sko... En jæja snjókoma eða ekki, eldhúsháfur eða enginn eldhúsháfur, gerum þetta að góðum degi og ég vona að allir hafi vaknað eins eld-eitur-hressir eins og ég

Krullur...... ;-)

Heilinn í mér er eiginlega að krullast upp þennan fína föstudagsmorgunn.... og það er nýja eldhúsið sem veldur því og vinnan mín eða kannski bara fæðingargalli ? Neibb eldhúsið og vinnan, varla séns í helv... að svona snillingur eins og ég sé með fæðingargalla Nú þarf eiginlega allt að gerast eins og skot, helst í gær eða bara áðan. Panta gólfefnið, fá eldhúsinnréttinguna í hús, kaupa loftljósin, skrifa þennan venjulega mánaðarskammt af vinnuskýrslum í ca 27 riti, vinna og fara til læknis.... Ok anda núna, ekki tími til að gera það aftur fyrr en eftir kvöldmat Ég hefði nú alveg getað skrifað vinnuskýrslurnar í gær, en ég var bara að gera allt annað og svo er það svo innilega þrautleiðinlegt að ég dreg það alltaf fram á síðustu stundu, sem er ósiður og ég veit það 1. maí fór friðsamlega fram, fram hjá mér og ég man ekki eftir að ég hafi mótmælt neinu nema pistli hjá Högna hrekkvísa og það var nú bara til að vera með smá leiðindi Ég sá veðrið í sjónvarpinu í gærkvöldi eiginlega bara dauðóvart og sá ekki betur að vorið ætli bara að mæta til okkar í dag eða á morgun, ef það breytist þá ekki bara í eitthvað allt annað ! Það er ekki hægt að segja með neinum sérstökum sannfæringarkrafti, að það sé vorlegt úti núna.... það snjóar..... Og ég ekki ennþá komin með útihitamæli, get kannski bara horft á nýju ruslatunnuna sem ég keypti í staðinn fyrir hann og reynt að ráða í hitann. Gamli mælirinn er nefnilega fastur í 7 stiga hita og er búinn að vera það síðan við fluttum hingað Njótið þessa dásamlega dags í hvívetna og verið góð við allt og alla, það er svo notalegt