3...2...1...0 !

Það kom oft fyrir á meðan við rákum gistiheimilið hérna, að það hringdu hingað menn sem spurðu eftir spúsa, margir vitandi það að hann vann lengi vel í vegavinnu úti á landi. Einn sagðist hafa verið á sjó með honum fyrir 30 árum síðan og spurði svo hvað gistingin kostaði, fyrir sig og fjölskylduna. Þá átti allt í einu að dusta rykið af eldgömlum kunningsskap og fá ódýra gistinguSvíðingurinn ég gaf auðvitað alltaf upp fullt verð en flestir komu nú samt. Ég hefði alveg getað fyllt húsið af þannig gestum, fólki sem hann þekkti og/eða hafði þekkt, en ég var nú ekki að reka þetta af hugsjón... Langflestir komu nú bara samt og gistu, alveg án þess að spyrja um verð. Einn af bestu vinum hans kom alltaf annað slagið og það hreinlega snaggaðist í honum fyrst, þegar hann heimtaði að fá að borga og ég nefndi einhverja smáupphæð... "Þetta verð er ekki til á neinu gistiheimili" ! Það svona lá við að hann argaði framan í mig, en ég er þrjósk og benti honum vinsamlegast á að ég væri forstjórinn og ég réði verðlagningunni algerlega. Síðan hefur hann alltaf borgað það sem ég hef sett upp, þegjandi og hljóðalaust, en skilið svo meiri peninga eftir undir koddanum. Ég er ekki alveg viss um að ég hafi unnið þessa viðureign Einn hringdi og bað um gistingu í tvær nætur, var að koma að austan til að ná í bíl eitthvað suður á land. Hann læddist eldsnemma út eftir fyrri nóttina, án þess að borga. Morguninn eftir vaktaði ég forstofuna, en hann hefur örugglega farið út um þakgluggann í herberginu sem hann var í, eða klifrað upp um skorsteininn ef hann væri einhver, bara til þess að ég kæmi ekki klónum í peningana hans. Nokkrum dögum seinna mætti ég honum inni á sjoppu austur á landi og hann horfði í gegnum mig, eins og hann hefði aldrei séð mig áður....Maðurinn er fífl og eftirá sagði spúsi mér frá því að þetta væri alkunnur svikahrappur... En allt löngu gleymt og grafið og er hætt að reka gistiheimiliVeriði góð

Tvær sekúndur og svo búið !

Aldrei get ég hætt að dásama það hversu ljúft það er, að vakna hress og frísk á morgnana Er að vísu mjög lítið að úthrópa það, það er ekki minn stíll, aldrei verið dugleg að predika yfir fólki, en það er samt ekkert leyndarmál að mér finnst þettaÞað er alveg nóg til, af sjúkdómum og öðrum andstyggilegheitum í lífinu þó maður sé ekki að gera eitthvað, eins og til dæmis að drekka sig fullan og virkilega leika sér að því að láta sér líða illa..... kannski á meðan og örugglega daginn eftir Ég þekki engan sem mundi til dæmis berja hvað eftir annað, viljandi með hamri á höndina á sér, bara til að finna til ! Það væri svo innilega hálfvitalegt... er það ekki ? Eða leggjast fyrir framan bíl og leyfa honum að keyra yfir sig..... Eða drekka bensín eða eitthvað annað álíka gáfulegt... En það er bara flott að hella í sig fullt af áfengi.....  Jamm og jæja og svo segist ég ekki predika Ég vorkenni innilega þeim sem vakna upp með timburmenn í dag.... tilboðið stendur í svona um það bil 2 sekúndur

Stóra stundin færist alltaf nær og ekki á morgun heldur hinn, skrifum við undir söluna á húsinu okkar og líka undir kaupin á húsinu okkar !  Að vísu flytjum við ekki fyrr en fyrstu helgina í apríl,  kaupendurnir vildu fá húsið afhent 31.mars, en það er nú bara pínu dónalegt vegna þess að það var af þeirra völdum sem þetta dróst svona. Svo er ég að byrja kvöldvinnuviku í kvöld og við erum í nefnd sem heldur árshátíð næstu helgi og ég er líka að vinna, svo það verða bara fluttir kassar þá dagana. En við erum búin að panta vini og ættingja 5.apríl í stórflutningana !! Dagurinn á  morgun verður svakalega langur hjá mér..... skil ekki hvað ég var að pæla eiginlega.... Klukkan 9 fer ég í klippingu, vinna 10-12, sinni erindi fyrir mömmu í hádeginu, vinn 13-15, plokkun og litun 15.30 og vinna 17-21... Dásamlegur dagur framundan Datt líka í hug að borða og fara á WC og setjast aðeins niður og gera akkúrat ekkert, en ekki alveg viss klukkan hvað..... Njótið dagsins elskurnar mínar allar

 

Gleðilega páska :-)

Það var nú nokkurnveginn það sem ég vildi sagt hafa þennan daginn Páskarnir eru fyrir mér, bara kærkomið frí og fínn tími sérstaklega núna, til að pakka niður fyrir flutningana. Ég fer ekkert í eitthvað sjálfvalið þunglyndi yfir einhverju, sem sagt er að hafi gerst fyrir tvö þúsund árum, hugsa ekkert um píslir eða krossfestingar eða annað í þeim dúr, það eru víst nógu margir vitleysingar sem missa sig þannig....  Væri fínt ef þetta með upprisu frá dauðanum væri staðreynd, ég á nokkra mér afar kærkomna, sem ég vildi að gætu lifnað við Kvöldmaturinn í gærkvöldi var ferlega góður, þó ég segi sjálf frá, enda er ég mjög góður kokkur... þegar ég nenni að elda Við vorum rétt búin að borða þegar fólkið sem er að kaupa húsið okkar birtist óvænt, tvenn ung hjón að sunnan, þau eru á skíðum á Dalvík yfir páskana og þau eru alveg jafnspennt að kaupa húsið okkar eins og við erum spennt að kaupa húsið niðurfrá ! Þau ætla að reka gistiheimilið áfram og nota íbúðina sem sumarbústað og spurðu enn einu sinni hvort ég væri ekki tilbúin til að sjá um reksturinn fyrir þau. Ó nei elskurnar mínar, aldeilis hreint bara alls ekki ! Ég er hætt, farin, búin, finito, aldrei aftur, ekki séns í helv....  Ég ætla að fara að snúa mér að allt öðru, til dæmis eins og því að eiga frí í sumarfríinu mínu í fyrsta skipti í.... ég veit ekki hvað mörg ár. Og mála ! Auðvitað til að byrja með veggina í nýja húsinu, en líka myndir.... ég er ekki ennþá búin að taka upp rammana og litina sem Birna systir gaf mér í afmælisgjöf í fyrra. Íbúðin okkar hér er niðurgrafin og gluggarnir litlir, engin almennilega aðstaða. En í nýja húsinu eru margir og stórir gluggar og þar eru sko gluggar á öllum veggjum Ó ég hlakka svo til !!!!! Njótið páskaeggjanna elskurnar Og síðast en alls ekki síst, takk fyrir að skrifa í gestabókina mína Árnína systir

Eru ekki allir kátir ?

Þessi kona hérna, álpaðist til að fara inn í geymslu í gærmorgun og ætlaði bara aðeins að gá hvort ekki væri eitthvað þar sem mætti pakka niður og kannski líka eitthvað til að henda.... það tókst !  Spúsi hlær að mér og finnst ég vera að misskilja þetta eitthvað... þetta sé eiginlega ekki alveg í réttum hlutföllum hjá mér, henda-hrúgan sé orðin stærri en flytja-hrúgan Fann svo gjörsamlega dauðóvart kassann með öllum geisladiskunum okkar, þennan með allri tónlistinni sem átti eftir að moka inn í tölvuna. Ég var ekkert búin að týna honum samt, nennti bara aldrei að finna hann, af því að ég vissi að það færi um það bil heill dagur í að setja þetta allt inn. Ég reyndist sannspá og sá dagur var gærdagurinn...... augun í mér voru orðin ferköntuð í restina  Ég taldi ekki alla diskana, það væri náttulega svakalega dugnaðarlegt að geta komið með einhverja glæsilega tölu á þetta, en þetta er fullur eplakassi af geisladiskum ! Ég vil hafa alla tónlistina í tölvunni, mér finnst það miklu skemmtilegra en að hafa helling af geisladiskum fljótandi út um allt, ef mér dettur í hug að spila tónlist. Svo er tölvan bara tengd við heimabíóið og ég sem er alltaf svolítið andlega flögrandi, get valið eitt lag af þessum diski og annað af hinum, án þess þó að þurfa að laga til á eftir. Ég veit að ég er ekkert að finna upp hjólið með þessu, en þetta er fínt fyrir letingja eins og mig, alltaf að gera mér hlutina auðveldari með öllum ráðum Inni í ísskáp bíður núna, þetta stóra fína læri frá okkar kæra vini bóndanum í Borgarfirði, það fer í moðsteikingu upp úr hádegi. Við borðum ekki betra kjöt en það sem við fáum hjá honum á haustin og eru löngu orðin fastir áskrifendur Svo koma eldri sonur minn, tengdadóttir og sonardóttir og borða það með okkur í kvöld. Ég á mér ósk og hún er sú, að öllum líði eins vel og hægt er og elskurnar mínar, gangið nú rólega og settlega um gleðinnar dyr

Ingi Stefán á afmæli í dag !

Hann er yngsta barnið mitt af 3, yngri sonur af tveimur og hann er 22 ára í dag Hann vinnur næturvaktir í 10-11 og er að vinna alla páskana, eins og flest afgreiðslufólk gerir núorðið. Eins gott að þau fái þá almennilega borgað !

Í dag er föstudagurinn langi og ég held ekkert að það eigi að segja gleðilega hátíð í dag eða er það ? Ég var ekki alin upp í neinu trúarofstæki, þannig að eina þýðingin sem páskarnir hafa alltaf haft fyrir mig er fríið og páskaeggið/in Sem ég er bara alls ekki búin að kaupa, en það gerist á morgun ! Klikka sko ekkert á því frekar en jólatrénu... það er að segja sko jólatréð hef ég að vísu bara á jólunum...  Ég er búin að pakka niður í 8 kassa, allar myndir og skraut að verða horfið af veggjum og skápum og hillum, sparistellið komið ofan í kassa, það er að vísu ekkert sparistell í alvöru, það er bara svo lítið skápapláss í eldhúsinu okkar hérna að það varð að vera í skáp inni í stofu. Ég læt sko alls ekki grípa mig dauða við að eiga eitthvað sérstakt sparistell, það er allt of fyrirmyndarhúsmóðurlegt ! Það snjóar úti í algeru logni, sem væri alveg yndislegt ef það væru jól, en það eru páskar og ætti að vera farið að vora eftir minni klukku, en hún hefur líklega alltaf verið vitlaust stillt Ég óska þess að þið öll eigið dásamlegan dag og ég líka, ég ætla að halda áfram að henda flestu af eigum okkar og pakka afganginum niður

 

Nú... af því að það er komið frí !

Ég er yfirmaðurinn og allir undirmenn líka, í pökkunardeildinni í Fjallakofanum. Við rífumst nokkuð oft við yfirmanninn og svo skamma ég undirmennina og skemmti mér vel"Enginn veit hvað átt hefur, fyrr en flutt hefur" er glænýr málsháttur sem ég stal frá konu á bloggsíðu bloggvinkonu minnar ! Allskonar smádótarí og allrahandanna drasl, sem ég tek ekki eftir dagsdaglega, vekur mér mikla undrun núna þegar ég er að pakka í kassana. Hvurn djö... er ég að eiga þetta og hvað í ósköpunum á það að þýða að vera að geyma svona ??? Það er hálfgert skítaveður úti og mér er alveg sama þó ég þurfi barasta alls ekkert að fara neitt út í dag. Ég er búin að opna fjórum sinnum fyrir kisa, svo hann geti sinnt sínum erindum úti, en hann hættir alltaf við og horfir á mig eins og ég sé viljandi að framleiða skítaveður handa honum... Láttu þetta hætta kona ! Okkur var boðið í heimsókn í heimahús í gærkvöldi, en ég nennti ekki að fara, enda svoleiðis heimsóknir ekki alveg þær allra skemmtilegustu sem ég fer í.... æi, til að vera nú alveg hreinskilin, það eru langleiðinlegustu heimsóknir sem ég fer í. Fólkið er samt frábært og skemmtilegt að öllu eðlilegu, en alltaf einn gestur þar sem ég kann mjög sjaldan að meta og hann heitir Bakkus. Hann fer ferlega illa með besta fólk og gerir það með eindæmum þreytt, þrasgjarnt og leiðinlegt, á meðan hann staldrar við. Það er ekkert verið að taka upp skemmtilegurnar og hafa gaman, ónei alltaf teknar upp leiðinlegurnar og gömul ósætti og rifrildi, klikkar aldreiÉg vil frekar fara í heimsóknir til sama fólks á daginn, en það er víst svo hallærislegt, sérstaklega þegar það er frí daginn eftir !! Mér er alveg sama þó ég sé talin hallærislegur félagsskítur í þessum hópi, ég get alveg lifað með því og það bara sérdeilis fínu lífi og þá sérstaklega daginn eftir Ég óska ykkur alls góðs inn í daginn, ég ætla að halda áfram að pakka niður 

Fjarsýn á öðru, nærsýn á hinu....

Mér tókst að týna gleraugunum mínum í gær  Það gerðist í slagsmálum við sófa, sem virtist bara ekkert kæra sig um að fara upp á aðra hæð í blokk, en hann lét auðvitað undan fyrir rest, ég vinn alltaf... næstum því Gleraugun voru nú bara keypt í Tiger, af því að þó ég hafi alveg haft tíma þá hef ég bara ekki gefið mér hann í mörg ár, til að fara til augnlæknis og í staðinn fyrir 400 krónur mundu alvöru gleraugu fyrir mína skjái kosta 40000 krónur..... Jamm og jæja einhvertímann gerist það Fasteignasalinn hringdi loksins í gær með þær fréttir að kaupsamningur vegna hússins okkar verður loksins tilbúinn til undirritunar á miðvikudaginn eftir viku og nú er mér þá líklega ekki stætt á því, að draga það lengur að fara að pakka niður ! Sama daginn skrifum við svo undir kaupin á draumahúsinu okkar Loksins allt að gerast og það er komið páskafrí, eiginlega alveg, bara dagurinn í dag eftir !!! Ég var nú satt að segja farin að láta mér detta í hug svona undir niðri, að það yrði ekkert af þessum kaupum og sölu, en af því að ég er svo mikill töffari þá var ég auðvitað ekkert að segja neinum frá því.... fyrr en eftirá þegar er allt er orðið í lagi Ég er svo furðuleg með það, að mér finnst að ef ég segi frá því sem mér líður illa út af, þá verði það meira að umfangi og ennþá óviðráðanlegra..... þá dreifist það á fleiri staði og verði meira.... Ok þetta er kolrangt er mér sagt, en þetta heitir líklega að vera lokuð.... En skítt með það, svona er ég bara, ekkert hægt að gera við því og ég hef hingað til getað lifað með því... góðu lífi Njótið þessa síðasta vinnudags fyrir páska og hafið það ferlega gott

 

Dýr lygi ;-)

Eitt af því sem ég vil fá í nýja eldhúsið okkar, er innbyggður örbylgjuofn í stíl við bakaraofninn, sem væri þá staðsettur í skápnum fyrir neðan. Bara af því bara ! Í einni raftækjaverslun sem við fórum í, er hægt að fá hurð í stíl við bakaraofninn, sem þú setur bara fyrir skápinn ofan við bakaraofninn og svo setur þú örbylgjuofn innanvið. Ég spurði til hvers ?? Ja sko bara svo að það sýnist sko vera dýrara !!! Ójá jæja, það er nú kannski ekki alveg minn stíll og þetta þarna plat, kostar rétt tæp 50 þúsund krónur íslenskar og mér sýnist það ekkert bara vera dýrt,  það er dýrt ! En ég vil ekkert plat, annað hvort alvöru eða ekki neitt, þannig að ég fer í einhverja aðra búð og kaupi alvöru innbyggðan örbylgjuofn og bæti við x þúsund krónum íslenskum og þá er það sem sagt ofninn með hurð og alles. Ég hef aldrei áður hannað mitt eigið eldhús og til að byrja með hafði ég bara tvær kröfur, ryksugu/kústaskáp en þeir eru víst ekkert inn lengur og ekki eina einustu hillu í neðri skápunum, bara skúffur en það er inn. Ef mér sko endist líf og heilsa, þá verð ég einhvertímann gömul kona og þá verður erfitt fyrir mig að bogra inn í neðri hillur í skápum og þá verður líka auðveldara fyrir mig að njósna um hvort konugreyið, sem kemur þá til mín frá heimaþjónustunni,  þrífur almennilega  Ég er eiginlega strax farin að vorkenna henni  Það virðist allt vera dáið í fasteignasölunni, sem sér um söluna á húsinu okkar, en ég ætla að hringja  þangað í dag og láta þá fá smá gæsahúð, þetta er nú orðið ágætt hjá þeim  Njótið dagsins í veðurblíðunni  

1500 kall !

Má til með að leyfa öllum að vita, að það eru mjög ódýrir menn til sölu í RL búðinni ! Alveg satt !!   Í gær fór ég með mömmu þangað til að kaupa sófa, sem hún og gerði. Ég held hún hafi bara verið mjög ánægð með kaupin og fær sófann sendan heim á morgun. Sá sem hún keypti var vitlaust verðmerktur, var sagður 5000 kr ódýrari en hann átti að vera, en verslunarstjórinn sem var sjálfur að afgreiða okkur, sagði að hún fengi hann samt á því verði. Kannski, en bara kannski hefur hann séð á mér að ég ætlaði að fara að segja eitthvað..... en ég þurfti ekki að segja orð ! Heimsendingin kostar svo þetta, en það kemur bara einn maður með. Ég hélt það væri nú í lagi, ég mundi bara mæta þegar væri hringt í mig og hjálpa honum upp með sófann og þá kom tilboðið : "En þú getur keypt mann á 1500 krónur" ! Vá en krúttlegt, bara allt svona ódýrt hérna og ef ég kaupi hann þá má ég auðvitað fara með hann heim, þegar hann er búinn að bera sófann ?!? "Ha... nei... hvað meinarðu....?" og svo fór hann bara að hlægja að mér.... Mér dettur sko ekki í hug að fara að kaupa eitthvað, sem ég má svo ekki taka með mér heim, auðvitað ekki ! Njótið þessa fína mánudags elskurnar mínar og munið að það er alveg að koma páskafrííííí !

Ég er tóm.....

.... þess vegna ætla ég ekkert að skrifa hérna í dag..... alla vega ekkert dónalegt eða ljótt eða merkilegt... frekar en venjulega... Nema kannski að í dag ætla ég að skondra í Rúmfatalagerinn, þeir eru að opna í nýju plássi á Glerártorgi, það hlýtur eitthvað að vera til þar, sem mig vantar í nýja húsið. Veit ekkert hvað mig vantar eða hvort mig vantar yfir höfuð eitthvað, en ég hlýt að komast að því þegar ég fer að skoða.... er það ekki svoleiðis sem maður gerir þetta ?  Mér finnst ekkert gaman að fara í búðir, ekki síðan ég hætti alveg að nenna að fara í Ríkið, nema mér finnst stundum gaman að fara í Rúmfó, hérna á Akureyri. Ég fékk auglýsingu frá þeim í gær og sá sófasett sem ég held að gæti passað fyrir mömmu, bæði er það nett og smart og líka á viðráðanlegu verði, meira að segja fyrir ellilífeyrisþega. Ég dreg hana með mér í dag, áður en ég fer að vinna. Ég er í alvöru hálfandlaus í dag, en það kemur samt ekki í veg fyrir að ég hafi ólæknanlega skrifræpu... Mér hefur verið tjáð af aðilum... samt alls ekki fagaðilum... heldur svona "beturvitrungum", að það sé ekkert normal að fara á fætur klukkan hálfsex á morgnana, bara til að fara á fætur og eiga ekki að mæta í vinnu fyrr en kl. 10. Og það er víst alveg sérlega óhollt að fara snemma á fætur um helgar og eiga bara alls ekki að mæta í vinnu Mér er alveg sama hvað klukkan er og líka hvaða dagur er þegar ég vakna, ég vakna bara þegar ég er búin að sofa, gera það ekki allir annars ? Það er hvorki fræðilegur möguleiki né mögulegur fræðileiki, að ég geti gert eftirfarandi þegar ég vakna : opna augun, líta á klukkuna, sjá að hún er "bara" 6 eða eitthvað, líta svo á dagatalið og sjá að það er laugardagur og snúa mér svo á hina hliðina og halda áfram að sofa... Ég gef kúk og kanil í klukkur og dagatöl og fer á fætur ! Ég er víst ekki normal ! Njótið ljúfs laugardags eins og kostur er