Þegar ég veit ég er dugleg...

... þá segi ég alltaf frá því, öllum sem heyra vilja og svo auðvitað öllum hinum líka... En það sleppur alveg vegna þess að það er ekki svo oft... í alvöru ! Ég geng hálfpartinn af göflunum hérna heima aðra hverja helgi og hreyfist svo varla þess á milli... nema til að vinna/sofa/éta... Tók mig til á sunnudagskvöldið eftir helgarinnar barnapass, kjötúrbeiningu, lopapeysuprjón, kleinubakstur og bíóferð og fór að brasa við að klára akstursskýrslur fyrir september og október... hætti því svo eftir nokkurt þóf, mér finnst það bara ekki vera fyrirhafnarinnar virði... Ég sé aðallega um eitt heimili í vinnunni minni, það telst vera mín starfsstöð svo þaðan byrja ég þá að mæla... tvo daga fyrir hádegi fer ég á annað heimili og hjálpa smá til þar, stutt þarna á milli þannig að alltaf aðra hvora viku keyri ég alls tvo kílómetra. Hina vikuna er kvöldvinna líka, þá keyri ég þessa tvo og svo hálfan kílómetra á kvöldi sem gera alls 5 1/2 km. En... ég verð að halda skýrslu fyrir hvern dag, skrifa kílómetratöluna á mælinum í bílnum þegar ég fer af stað og þegar ég er komin á leiðarenda... setja tölurnar og hvert ég ek í það og það skiptið á blað fyrir hverja einustu hreyfingu, hreinskrifa svo allt heila gallaríið eftir hvern mánuð... og svo fæ ég bara skít og kanil fyrir hvern ekinn kílómetra Að vísu var mér tjáð að vinnuveitandi minn mætti aldrei borga mér minna en 3 km í hvert skipti sem ég starta bílnum... tat var ok... en það get ég bara ekki með nokkru móti látið ganga upp á skýrslunni, þá yrði ég að fara að skrifa skáldsögu... í skýrsluformi... Þar fyrir utan get ég auðveldlega labbað þetta flesta daga en ef ég á nú að vera alveg hreinskilin þá bara nenni ég því ekki fyrir mitt litla líf Ferlega góð inn í þennan fína dag og finn jólin nálgast... Góðan dag elskurnar mínar    

Barasta ennþá með hellur fyrir eyrunum...

... eftir barnapass í gærkvöldi ! Fór um fimmleitið í gær til sonar og tengdadóttur til að passa litlu dúllurnar þeirra svo þau gætu farið út að borða, austur í Vaglaskógi með vinnufélögum hans. Átti nú ekki að vera svo flókið eða erfitt skoLinda Björg 4 ára var svo ánægð með að amma ætlaði að passa að hún kvaddi varla foreldrana...Enda allir verstu ósiðirnir stundaðir af miklum móð hjá ömmunni... hún mátti borða inni í stofu og horfa tvisvar á nýja Strumpadiskinn og fékk svo alveg tvo ísa... Hún var líka eins og sá engill sem hún er, allan tímannLára Rún 5 og hálfs mánaða var svo sem ánægð með ömmuna líka... til að byrja með...En um hálfáttaleitið þegar hún átti að fá pelann þá upphóf hún raust sína og það munar svo sannarlega um það þegar hún byrjar þessi elska...Þetta litla brosmilda, meðfærilega og yfir höfuð virkilega þægilega litla kríli argaði í einn og hálfan tíma... eftir klukkutíma konsert gaf ég henni stíl... vissi ekki mitt rjúkandi ráð og hefði virkilega þurft eitthvað af þessum stílum sjálf og mikið af þeimÞað virtist nú samt ekkert vera að henni af því að hún var ágætlega ánægð niðri í stofu... upprétt og þá varð smá hlé á tónleikunumEn ef ég lagði hana útaf... í fanginu á mér, það var nú ekki eins og ég væri að pína hana í rúmið... þá var hléið búið og pelann vildi hún alls ekki sjá Eftir þennan afskaplega þreytandi konsert fyrir okkur báðar, sem hlýtur að hafa hljómað vel greinanlega út um alla sveitina sofnaði hún loksins og ég gat sett hana í rúmið... uppgefin á sál og líkama eiginlegaVar einhversstaðar undir öllu þessu háværa eyrnakonfekti alvarlega farin að hugsa um að hringja í foreldrana en þau voru í þriggja kortera keyrslufjarlægð svo ég lét það vera, þau fara ekki svo oft eitthvað bara tvö saman og svo vildi ég nú ekki heldur láta grípa mig dauða við að ráða ekki við eitt smábarn...Elskan litla var ennþá með ekka í svefninum þegar ég fór heim um hálftólf... Vona bara að henni hafi ekki orðið meint af passinu hjá þessari vitlausu konu sem virtist bara alls ekkert kunna að gera hlutina rétt... mér varð ekkert meint af þessu, ætla bara ekki að passa alveg strax afturNúna er ég í helgarfríi og ætla virkilega að njóta þess... góða helgi elskurnar mínar allar

Pé ess: Prentvillupúkinn hérna vill ekki samþykkja "barnapass" en sér ekkert athugavert við barna"hass" !

Þá er kominn vetur... formlega ;)

... og lítið hægt að gera við því nema þakka öllum fyrir sumarið og vona svo að næsta sumar komi sem fyrst... helst bara strax eftir jólinÉg var á báðum áttum um daginn hvort ég ætti að fara í  H1N1 sprautuna... hætt að kalla þetta svínaflensu, ömurlegt nafn... af því að ég hef alltaf veikst af flensusprautumÞað voru einu skiptin sem ég fékk flensu, strax daginn eftir sprautu og lá í viku í hvert skipti svo ég hætti að láta sprauta mig við þeim og hætti þar með að fá flensur. Ég sá tvo kosti í stöðunni núna... annað hvort að sleppa því að fá sprautuna og fá kannski þessa flensu og smita þá alla í kringum mig eða láta sprauta mig, veikjast kannski eitthvað en smita ekkiTók auðvitað seinni kostinn, fórna sér fyrir málstaðinn krakkar mínir, hef ekkert orðið veik og hélt ég væri sloppin... en svo frétti ég að það geti tekið 3 vikur fyrir þetta dót að fara að virka... jamm við sjáum þá bara til í 2 vikur í viðbót...Búin með bolinn og aðra ermina á fyrri lopapeysunni sem ég er að prjóna, ætla að klára hina ermina í dag á milli þess sem ég skrepp af og til í vinnunaVið Andrea tengdadóttir mín fórum á búsáhaldamarkað á föstudaginn og það er agalegt hvað ég hef gaman af að fara á svona markaði, sérstaklega þar sem er líka jóladót... og hættulegt fyrir veskið mitt  Annars eru helstu fréttir héðan þær, að það er bara yfir höfuð alls ekkert að frétta... Ég les þetta yfir og sé að líf mitt einkennist af hverjum hörkuspennandi atburðinum á fætur öðrum, skemmtanalíf mitt er greinilega í algleymingi og dagskráin þétt setin af einstökum viðburðumTil að toppa þetta nú endanlega verð ég líka að segja frá því að ég keypti mér peysu á 8000 kall og festi upp kertastjaka á vegginn í borðstofunni... þeir voru búnir að rykfalla uppi í hillu í meira en árVona svo að þið skiljið hvað það getur verið erfitt að lifa sífellt í allri þessari spennu... og af hverju ég bara ræð ekki við að skrifa meira um þaðEigið góðan dag elskurnar, það lítur út fyrir að ég komi til með að eiga það líka

Pé ess: Ég setti inn nokkrar myndir, í fyrsta skipti í marga mánuði...

Það er svo mikil ró...

... yfir öllu snemma á morgnana í húminu... samt töluverð bílaumferð um þessa miklu umferðagötu sem ég bý við en mér líkar það vel. Húsið stendur eins langt frá götunni og hægt er, svo það heyrist lítið sem ekkert í bílunum. Gott að byrja daginn svona í rólegheitum... ekki það að líf mitt sé hlaðið stressi, ekki lengur... Það er töluvert síðan ég ákvað að það væri í mínu valdi að loka stressið úti, það stjórnaði mér allt of lengi og er fjarskalega óhollt... Svo ég losaði mig við gistiheimilið og hef aldrei á ævinni unnið eins lítið og ég geri núorðið, bara að vinna 100% vinnu... losaði mig líka smám saman við allt óþarfa tuskuæði og tókst að draga verulega úr fullkomnunaráráttunni líka ! Stressið fór úr 90 % niður í svona 15%... ég er náttulega ekkert fullkomin í þessu og hef líka ekki mikla löngun til þess... þetta er miklu betra svona Ég var í langan tíma svo stressuð og yfirfull af fullkomnunaráráttu að ég kveið fyrir því að byrja á einhverju af því að ég var alveg viss um að það gæti aldrei orðið nógu vel gert... þvílíkt rugl... En svo tók ég mér tak, reif mig upp á rassg... afsakið orðbragðið en svona var það bara... og notaði alla rassvasasálfræði og hundasálfræði á sjálfa mig sem ég gat fundið og það virkaði bara verulega vel... Að vísu poppar alltaf upp annað slagið svona smávegis af þessu öllu saman og ég veit ekki af mér fyrr en ég er búin að þrífa allt og þá meina ég allt húsið, prjóna 2 lopapeysur, 4 barnapeysur, 6 pör af lopaleystum og bæta við mig í vinnunni minni... og það allt á einum mánuði... En ég hugga mig við að það bráir af mér inn á milli... sem betur fer... það nefnilega gerði það ekki áður... og svo er ég nú auðvitað verulega stolt af árangrinum Og ég passa sérstaklega vel að leyfa mér ekkert stress í aðdraganda jólanna, það nefnilega eyðileggur tilhlökkunina og það vil ég ekki. Gott ráð að nota til dæmis alls ekki kreditkort... ég þekki fullt af fólki sem nýtur bara alls ekki jólaundirbúnings eða jólanna sjálfra vegna þess að það hefur svo miklar áhyggjur af því hvað þetta allt muni kosta.... Það er verulega slæmt en samt alls ekki óviðráðanlegt Það er svo margt sem er alger óþarfi, eins og til dæmis að mála megnið af húsinu korter fyrir jól, kaupa allt mögulegt, jafnvel húsgögn... ef það er hægt að lifa alla hina 11 mánuðina án alls þess þá er það líka hægt í desember. Kaupa ný föt á allt liðið... vitleysa bara... föt sem eru svo kannski ekkert notuð nema rétt yfir jólin. Þrífa í tryllingi alla skápa og skúffur og loft og veggi... rugl, bara gera það jafnóðum yfir allt árið. Hafa í huga að ódýru og jafnvel heimagerðu jólagjafirnar gleðja oft bara meira en þær sem eru keyptar dýrum dómum í búð... Ég er þrælsek um að hafa gert allt þetta... í mörg ár... þangað til ég komst að því að jólunum er alveg nákvæmlega sama hvort allt þetta er gert eða ekki... þau koma samt Og ég nýt þeirra mun betur óstressuð ! Eigið góðan dag elskurnar og ennþá betri helgi

Sko...

... nú er ég komin á fullt í jólagjafaundirbúningEr nú samt ekkert byrjuð að skreyta en mér finnst gaman að sjá að það er aðeins byrjað hérna í bænum samt ! Fyrri lopapeysan af 2 komin á prjónana og svo ætla ég ekkert að prjóna meira af jólagjöfum, kaupi bækur handa restinni af liðinu... mér finnst nefnilega að börn eigi að lesa meira en þau gera. Það er svo sem engin trygging fyrir því að þau lesi bækur sem ég gef þeim en ég úthluta sjálfri mér samt priki fyrir að reynaSvo er fyrir mér alger leyndardómur hvað við getum gefið öllum fullorðnu börnunum okkar, fólk sem er búið að koma sér fyrir í lífinu og á allt... en ég finn trúlega eitthvað út úr þvíLífið þessa dagana er eiginlega bara vinna, éta, sofa, prjóna og ég er nokkuð sátt við það svona í aðalatriðum. Að vísu er tvennt að angra mig hérna nálægt mér... út af öðru er ég sár og hinu reið... er að leita leiða til að gera eitthvað af viti í þessu tvennu en sé ekki ennþá að ég geti gert neitt... en get samt ekki fundið leið hjá mér til að sætta mig við ástandið eins og það er... en ég geri eitthvað í þessu... ég er kona framkvæmda og það fer ekkert fram hjá neinum þegar ég byrjaÆi þetta var nú svona hálf vandræðalegur útúrdúr sko...Ég ætla að setja inn hinar og þessar myndir á eftir, hef ekkert gert af því svo lengi en samt er alltaf eitthvað að gerast sem mér finnst vera myndefni ! Það er eiginlega tvennt sem ég hef ætlað að gera fyrir mörg undanfarin jól en ekki komist til þess... fara að minnsta kosti þrisvar sinnum í Jólahúsið og kaupa mér bláa sérryflösku... nú ætla ég að láta verða af þessu... að minnsta kosti klikka ég ekki á Jólahúsinu þetta áriðSko ég er ekkert alltaf alveg normal... ég skil alveg þetta með Jólahúsið en ekki þetta með sérrýflöskuna... drekk ekki svoleiðisÞað er fallegt haust/vetrarveður þessa dagana og ég sakna þess ekkert að hafa ekki snjó, hann má heldur ekki koma alveg strax af því að ég lofaði yngri syni mínum að prjóna á hann hnéháa  lopaleysta sem hann ætlar að nota þegar hann fer á snjóbretti, en hef bara alls ekki tíma til þess alveg á næstunniVona að dagurinn verði ykkur góður 

Dásamlega gáfuleg fyrirsögn hjá mér...

Veit fátt betra...

... en að vakna snemma á morgnana í rólegheitum, hvort sem ég er að fara að vinna eða ekki Að fara á fætur 6 hálf 7 um helgar er víst ekki talið alveg normal... sérstaklega þegar maður þarf þess alls ekki og ég tala nú ekki um ef manni finnst það gott líka... þá tekur nú steininn úr Ég læt allar klukkur lönd og leið þegar kemur að háttatíma og fótaferðatíma... fer að sofa þegar ég er syfjuð og á fætur þegar ég vakna... vísarnir á klukkunni stjórna því ekki Var svo dugleg hérna heima í gær að það hálfa væri nóg... nei það er ekki rétt, helmingi meira hefði verið betra en dagurinn var bara ekki nógu langur... Ég er svo sannarlega engin fyrirmyndarhúsmóðir og hef aldrei verið og verð aldrei, en ég fæ svona köst af og til og hef ekki þolinmæði til að bíða eftir því að þau líði hjá og því fer sem fer... Við fengum sendar bækur sem gamli minn og fyrri kona hans áttu, þær höfðu verið í geymslu í gömlu húsi fyrir austan, en nú á að fara að rífa þetta hús svo ég ákvað að taka þær að mér... vissi samt ekki magnið fyrr en þær voru komnar í hús... þær eru rúmlega 300... bara svona lauslega talið Gaman að þessu og mér finnst líka svo heimilislegt að hafa heilan vegg með bókum... falla nú að vísu ekki allar að mínum lestrarsmekk en það gerir ekkert til ! Hún Linda Björg eldri sonardóttir mín 4 ára síðan í síðasta mánuði, var hjá mér smástund á föstudaginn. Henni finnst svo mikið sport að labba upp í búð með ömmu sinni og hefur alltaf það erindi að við verðum að kaupa eitthvað handa afa... afi fær alltaf sinn að sjálfsögðu bráðnauðsynlega lakkrís og súkkulaðiskammt þegar hún er búin að vera í heimsókn Og hún sagði mér svona í leiðinni að ég yrði nú að kaupa eitthvað mjög gott nammi handa henni af því hún væri svo stillt og góð stúlka   Henni hafði áskotnast fimm hundruð króna seðill og þegar ég ætlaði að taka veskið mitt með sagði hún að ég þyrfti þess ekki: "Ég á svo mikið af peningum, ég skal kaupa allt sem þig langar í amma  mín" ! Dásamlega litla mannvera Nú ætla ég að halda áfram í dugnaðarkastinu mínu... það er nefnilega alls ekki gengið yfir, því miður Eigið sælan sunnudag elskurnar   

Og takið nú eftir... :)

Ef ég ætla að vera hraust, grönn, ung, hress, fitt, falleg, ánægð og hamingjusöm ævina út þá verð ég að taka mig á og fara að borða... Ekki það að ég borði ekki... svona yfirleitt á hverjum degi þegar ég man eftir því... en ég verð algerlega að breyta mataræðinu... Það er ekki nóg að borða góðan morgunmat... eins og ég geri alltaf ég má nú eiga það... og sem fjölbreyttasta fæðu það sem eftir er dagsins og endurtaka þetta helst daglega... Nei sko... ég þarf að fara í heilsubúð og kaupa mér alls konar töflur og safa sem auka virkni ristilsins, eyða óæskilegri magafitu, hreinsa lifrina, styrkja hjartað, hressa upp á minnið, yngja húðina, bæta sjónina, margfalda heilastarfsemina og svo eitthvað fleira sem ég man ekki... Mætti kannski athuga þetta með minnistöflurnar...Og þó svo ég væri í líkamsrækt daginn út og inn... sem ég er alls ekki... til þess að vera nú allt það sem ég nefndi í fyrstu málsgrein og til að halda mér grannri, grannri og  grannri... það er ekkert annað sem blívur eins og allir vita... þá er það samt barasta alls ekki nóg... Ég yrði að kaupa mér fæðubótarefni sem hjálpa magavöðvunum og annað sem eykur úthaldið og eitthvað fleira sem er alveg hreint bráðnauðsynlegt til að líkamsræktin skili bara yfir höfuð einhverjum árangri ! Þegar þarna er komið sögu er ég orðin illa blönk, þunglynd, lögst í ódýrt skyndibitaát og orðin 100 kíló plús...Mér líst ekkert á það svo ég læt mér nægja minn bara sæmilega skynsamlega matseðil með lýsi og C-vítamíni, sleppi öllu hinu og  nota peningana frekar til að kaupa mér ávexti, grænmeti og góða skó... Fer svo út að labba þegar ég get, fer stigana í staðinn fyrir að taka lyftur... bæði vegna þess að það er hollara fyrir skrokkinn og vegna þess að mér er illa við lyftur... og svo brosi ég, hlæ og fíflast út í eitt, sem er líklega þegar upp er staðið langsamlega heilsusamlegasta líkamsræktinLeti og níska ? Kannski það en ég er ung, hraust, heilbrigð, ánægð og hamingjusöm...Ofsalega grönn hef ég aldrei verið og verð aldrei, fyrir nokkrum árum missti ég nú samt 10 kíló á 15 dögum en þá var ég veik og ég mæli ekki með þeirri megrunaraðferð... og mér leið ekki vel fyrr en ég var komin aftur í mína kjörþyngd ! Jæja elskurnar mínar, ykkur hlýtur að líða miklu betur eftir þennan fyrirlestur í heilsufræði, þið borgið svo bara um leið og þið farið útGóðan dag allir

Það er sól úti núna...

... eða ég held að þetta sé örugglega sólin... langt síðan ég hef séð hana sko Ég er eiginlega farin að finna fyrir smá jólafíling... en ekki segja neinum frá því samt... Er með lítið, skrítið og skemmtilegt verkefni hérna heima þessa dagana... Vinabrauð er það kallað og er upprunnið hjá Amish fólkinu í henni Ameríku. Þetta er súrdeig í poka og fylgir sú saga að þessu hafi verið smyglað til landsins af konu sem ég man ekki hvað heitir og enginn veit hver uppskriftin er, hún er algert leyndó ! Á hverjum degi þarf ég að losa loft úr pokanum og eftir einhverja daga á að bæta hveiti, sykri og einhverju fleiru út í og svo eftir x marga daga á að klára að bæta öllu útí sem á að vera. Þá skiptir maður því í nokkra poka og bakar brauð út einum skammti, geymir einn en gefur hina. Leiðbeiningarnar eru svolítið óljósar hjá mér af því að ég nenni ekki að standa upp og labba alla leið hérna yfir holið og sækja blaðið sem þetta er allt samviskulega skrifað á... en í aðalatriðum er þetta svona Það er einhver draugagangur í gleraugunum mínum... ég er alltaf að þurrka sama blettinn af öðru glerinu, en hann kemur bara aftur og aftur... Nú er ég ekki að vinna kvöldvinnuna mína þessa viku... fínt að fá hvíld en ég verð alveg tilbúin að byrja aftur næsta mánudag eftir fínt frí í heila viku... er nú samt að vinna á morgnana þessa viku Langaði til að skrifa eitthvað hérna þó ég hafi ekkert skemmtileg, gáfulegt eða spennandi að segja... en það kemur þá bara seinna... löööngu seinna Eigið góðan dag elskurnar og ennþá betri viku  

Kúkurinn í lauginni...... :))

... það er égEkki einn einast nýr pistill eftir bloggvini mína sem býður eftir mér til að lesa í góðu tómi eldsnemma að morgni yfir kaffibollanum mínum... aldrei gerst áður...Að vísu eru nú þrír bloggvinir mínir "opinberlega" hættir að blogga hér á þessu svæði út af einhverjum kalli sem sem þáði starf sem ritstjóri á dagblaðinu sem heldur úti þessu bloggi...Leiðindagaur það, virðist hafa þennan lítt dásamlega hæfileika að skapa úlfúð hjá stórum hópi fólks, eingöngu með því að vera til virðist vera... jú og líklega fyrir sum verk sín líka sem hafa ekkert vakið almenna aðdáun og þá er ég ekki að meina sögur hans eða ljóðEn, sumir virðast bara komast upp með næstum því hvað sem er í krafti valds og peninga, en ég læt bara frekar erfiðlega að stjórn og rekst líka herfilega illa í hóp þannig að ég leyfi bara ekkert þessum manni né nokkrum öðrum að stjórna því hvað ég geri eða hvernig mér líður eða hvar ég er...Ekki þekki ég þennan mann nokkurn skapaðan hrærandi hlut, mjög trúlega hefur hann eitthvað til síns ágætis eins og flestir aðrir... hef eingöngu lesið um afrek hans í fréttum og veit ekki nákvæmlega hvað hann er gamall en veit þó að hann nálgast það óðfluga eins og kemur fyrir á bestu bæjum, að verða gamall. Það er ekkert að því að verða gamall, það endar með því hjá flestum ef þeim endist aldur til, en ég hef þó nokkra reynslu af því að vinna með gömlu fólki og þykist hafa séð að þegar fólk eldist skiptist það að megninu til í tvo hópa, stjórnsama beturvitrunga... nokkurnvegin óþolandi einstaklingar verð ég að segja... eða þá að það einhvernvegin koðnar smám saman niður andlega, líklega bara þreytt eftir langa ævi... en eiginlega ekkert auðveldari einstaklingar samt að umgangastSvo er sem betur fer til þriðji hópurinn... í sorglega miklum minnihluta og því miður ekki eins áberandi og hinir tveir... en sem ég virkilega elska... og það er fólkið sem leyfir sér ekkert að hætta að hlægja og lifir lífinu lifandi... af því að það er á lífiHeld að þessi maður sem fólk leyfir að stjórna sér og líðan sinni sé í fyrsta hópnum... slæmt en svona er lífið...Ég prívat og persónulega ætla að gera allt sem í mínu valdi stendur til að passa inn í síðastnefnda hópinn þegar ég verð stór... hef áætlanir um að verða allra kerlinga elst.... og skemmtilegustGóðar stundir elskurnar mínar allar

Ég er sko ennþá hérna... :))

Alltaf alveg sérstaklega gaman að eiga afmæli og ég ætla svo sannarlega að halda því áfram eitthvað framvegis Fékk fullt af yndislegum gestum, saknaði líka fullt af yndislegum gestum en þeir koma þegar betur stendur á hjá þeim. Ekkert atriði að fólk komi bara í heimsókn til mín á afmælinu mínu enda væri það ferlega fúlt... En ég gæti alveg átt afmæli í hverjum mánuði... 52 ára og 1 mánaðar gömul í nóvember og svo framvegis sko ! Ég fékk auðvitað gjafir sem mér finnst alveg yndislegt og líka þrjár útgáfur af blómum... afskorin blóm, pottablóm og niðursoðið blóm í dós... æðislegt Svo átti ég líka afmæli á Feisbúkk þar sem ég er inni með "örfáum öðrum"... hef ekki glóru um hvað kveðjurnar voru margar en ég hefði orðið handlama ef ég hefði reynt að þakka öllum persónulega... það var fjör skal ég segja ykkur og þar er bara fólk sem ég þekki Annars er ég ekki mikið þar inni og ekki í neinum leikjum eða könnunum eða neinu svoleiðis... enda allir hættir að reyna að fá mig með... félagsskítur... Fæ samt alltaf helling af tilkynningum um að einhverjir "vinir mínir" séu að senda mér hitt og þetta... búin að fá til dæmis sent börn, húsgögn, blóm, bíla, kossa, ást, áfengi og allt sem hægt er að láta sér detta í hug, meira að segja niðurgang... en allt er þetta nafnlaust og líklega tilraun til að fá mann til að heimsækja einhverjar síður, en ég læt ekki grípa mig dauða við það Það er verið að grafa út við götuna við næsta hús fyrir neðan okkur hérna og í gær var heita vatnið tekið af, það var orðið andstyggilega kalt hérna inni um miðjan daginn... í dag verður svo rafmagnið tekið af en það gerir nú minna til... nota bara tímann til að ryksuga á meðan eins og konan hérna um árið... æi það var víst ég sjálf... Við fórum í leikhúsið gamli minn og ég á laugardagskvöldið á "Við borgum ekki x 2" það var alveg ágætt en mér fannst það einhvernvegin svo flausturslegt samt... eins og þessu hefði bara verið klastrað saman í einhverju snarhasti... en líklega er það bara ég... Vona að þið njótið þess að það er kominn miðvikudagur og gerið eitthvað gott úr honum, það ætla ég að reyna